O pasado xoves 30 de Xuño, o grupo municipal do BNG obtivo o respaldo unánime do Pleno de Vilagarcía, na moción presentada por esta formación en defensa da Vía Musical e Escénica do Bacharelato de Artes do IES do Carril. Cabe lembrar que a LOMLOE abre de novo a porta a esta vía dentro do Bacharelato, que o IES ofertou na década pasada -ate que foi eliminada pola LOMCE- e mesmo nestes anos, indirectamente, se fora impartindo a través de materias opcionais.
O desexo de impartir novamente dita Vía Musical e Escénica para o vindeiro curso académico, viuse frustrado perante a decisión da Inspección de non autorizar a súa impartición, unha decisión a todas luces desafortunada, que choca coa oposición do Claustro e Consello Escolar, e de xeito oficial, tamén agora, pola representación da cidadanía no Concello de Vilagarcía.
Tras este paso dado desde instancias municipais, entramos nunha nova fase na que os deputados do BNG Montse Prado e Manu Lourenzo, veñen de rexistrar no Parlamento Galego unha iniciativa para que esta cámara inste á Consellaría de Educación a dar marcha atrás neste novo recorte do ensino, e deste xeito non limite as necesidades formativas do alumnado da nosa comarca.
