- O peirao da vila acollerá a partir das 11.30 horas a competición das traiñeiras da Liga B e a continuación, as da Liga A
Bueu celebra este domingo, 27 de xullo, a partir das 11.30 horas, a I Bandeira Praia de Pescadoira e a XXX Bandeira Concello de Bueu de Traiñeiras, nas que participa o Club do Mar Bueu – Simei coas embarcacións masculinas sénior.
Este xoves tivo lugar a rolda de prensa, na que estiveron presentes Félix Juncal, alcalde de Bueu, Ricardo Verde, concelleiro de deportes, Silvia Carballo, edil de turismo, Carmen García, concelleira de cultura, Alberto Chapela, Javier Pazos e Rosario Freire, da directiva do Club do Mar Bueu Simei.
Primeiro desenvolverase a I Bandeira Praia de Pescadoira, que leva no seu título a reivindicación pola rexeneración da praia e a demanda da rampla para o club, e nela participarán os clubs da Liga B, concretamente CR A Cabana – Ferrol, CR Puebla, CR Chapela- Wofco B, Club do Mar Bueu Simei B e CR Salgado – Perillo. Despois será a XXX Bandeira Concello de Bueu de Traiñeiras, na que competirán os da Liga A, é dicir, CR Chapela Wofco, SD Samertolameu – Oversea, SD Tirán- Pereira, CM Castropol, Club do Mar Bueu Simei, CR Urme, CR Narón, CR Mecos, CM Mugardos, CR Cabo da Cruz e CCD Cesantes- Rodavigo.
As probas sairán dende o peirao e decorrerán ata as praias de Agrelo – Portomaior. A competición desenvolverase nun campo clásico, de 4 longos e 3 viradas por babor, completándose un percorrido regulamentado de 5556 metros.
Ámbalas dúas probas serán televisadas pola TVG 2 o domingo ás 18.30 horas.
