• O alcalde, Jacobo Pérez, e o tenente de alcalde, Manuel Fariña, acompañaron a un grupo de representantes da ANPA á Xefatura Territorial de Educación, en Pontevedra, onde fixeron entrega dunhas 1.400 firmas en apoio da reactivación da unidade suprimida polo Goberno autonómico do Partido Popular a finais do curso 2023- 2024
• O bipartito lembra que existen prazas suficientes para retomar a actividade esta unidade e considera que “non hai razóns para manter ese peche”, tendo en conta a demanda existente
O alcalde de Caldas de Reis, Jacobo Pérez, e o tenente de alcalde, Manuel Fariña, acompañaron na tarde deste mércores a unha delegación Asociación de Nais e Pais de Alumnos (ANPA) do CEIP San Clemente ata as dependencias da Xefatura Territorial de Educación da Xunta de Galicia, en Pontevedra, onde se fixo entrega dun documento que inclúe preto de 1.400 firmas en favor da reapertura da terceira Unidade de Educación Infantil, suprimida polo Goberno autonómico do Partido Popular a finais do curso pasado (2023-2024). Unha unidade que, tal e como lembra o bipartito e o tecido educativo do colexio caldense, a propia Consellería de Educación se comprometeu a reactivar ante a Valedora do Pobo.
O Goberno local salienta que estas rúbricas, recollidas en pouco máis dunha semana, deixan patente o respaldo do que goza a petición formulada pola ANPA. Tanto Jacobo Pérez como Manuel Fariña volveron incidir en que existe unha demanda de prazas máis ca suficiente como para que a Xunta de Galicia reabra a terceira unidade de Educación Infantil. O Concello de Caldas de Reis e a asociación de nais e pais do centro educativo lembran que, ante o elevado número de peticións de matriculación, o feito de que non se reabra esa unidade conlevaría a realización dun proceso de baremación, que provocaría que varios solicitantes quedasen sen praza.
O Goberno municipal ten claro que a Xunta de Galicia debe ter en conta as demandas da comunidade escolar e reabrir a terceira Unidade de Educación Infantil, xa que “os números dan”. Ademais, os dirixentes locais volveron deixar patente a súa oposición á política de recortes aplicada polo Partido Popular en eidos tan importantes como o da educación ou da sanidade, que son “servizos esenciais e de primeira necesidade para toda a cidadanía”.
