O alcalde de Portas e deputado provincial, Ricardo Martínez, asisitiu a esta popular e tradicional celebración.
O mal tempo reinante non puido coa tradicional celebración do San Benito de Lantaño que contou coa presenza dun número importante de devotos que non quixeron faltar á cita anual que teñen co santo miragreiro. Entre os asistentes a esta celebración atopábanse o alcalde de Portas e deputado provincial, Ricardo Martínez, e as concelleiras Ana Peña e Chus Fontán que compartiron a xornada coa veciñanza.
Pese á choiva, nas inmediacións da igrexa parroquial de Lantaño instalaron os habituais postos de venda de polbo á feira, empanadas e rosquillas que desafiaron ao mal tempo para seguir dando o servizo aos devotos que se achegaron para honrar a San Benito.
Desde as 8 da mañá fóronse celebrando as misas cada hora e tamén ás 18, 19 e 20 horas pola tarde. A misa solemne cantada polo Coro Parroquial de Briallos tivo lugar ás 13 horas, pero a procesión non puido saír porque o mal tempo reinante desaconsellou en todo momento que se puidera realizar esta actividade relixiosa, acompañada pola Banda Unión de Lantaño.
Pendentes da evolución do temporal, a Comisión de Festas ten previsto comezar a verbena ás 21:30 horas e correrá a cargo da coñecida orquestra Capitol que contara co Dj Pablo Grande para prolongar os momentos de festa e baile.
O alcalde, Ricardo Martínez, lamentou o mal tempo e consolou durante a súa estancia nas inmediacións da igrexa parroquial tanto a devotos como membros da Comisión que se lamentaban polo mal tempo reinante que malogrou que a celebración deste ano tivera a proxección e o realce que ten habitualmente.
