Pídelle que siga o exemplo de Covelo, As Neves ou A Cañiza
Xoán C. Montes Bugarín -Calis-, portavoz de AporM, vén de rexistrar un escrito solicitando a
reapertura da piscina municipal do Pé do Muíño “neste verán”. Calis sinala que as medidas
sanitarias que están a adoptar tanto o goberno de España como o goberno da Xunta de Galicia van no sentido de relaxar, de forma progresiva, as restricións (uso da máscara, utilización dos espazos públicos, etc), de forma que “o escenario que se presenta é moito máis favorable que o que vivimos ata agora, facendo viable a recuperación da vida social que vivimos antes da pandemia”.
O líder da oposición mondarizá pídelle ao goberno municipal que mire a concellos como
Covelo, As Neves ou A Cañiza, que abrirán as súas piscinas nas próximas semanas, “o que
conecta coa demanda da veciñanza de Mondariz, que está a vivir agora unha onda de calor
que volverá con máis forza nos meses de xullo e agosto”.
AporM pídelle ao goberno local que “adopte todas as medidas de seguridade necesarias para
dar este servizo este verán, controlando a capacidade de acollida e limpando as instalacións
coa periodicidade necesaria, sobre todo os vestiarios”. Montes Bugarín avoga porque
Mondariz vaia recuperando pouco a pouco a normalidade da vida social, o que pasa por
recuperar servizos públicos como o da piscina municipal.
Deterioro das instalacións
O portavoz municipalista sinalou tamén que “se este verán non abre a piscina, sumará dous
anos pechada, o que provocará o deterioro das instalacións, de forma que, cando reabra en
2022, as obras que haberá que acometer con cargo ao orzamento municipal serán maiores”.
