O alcalde segue pensando que é máis eficiente para a entidade bancaria reabrir a oficina que desprazar un autobús e tres empregados ata o municipio
Os veciños e veciñas de Campo Lameiro recuperaron esta mañá o servizo bancario presencial a través de unha unidade móbil desprazada ata a Praza do Concello por Abanca que permitiu atender desde as 9 ás 14 horas a un cento de persoas, a gran maioría de idade avanzada.
En cumprimento ao compromiso adquirido polos responsables territoriais de Abanca e o alcalde do Concello de Campo Lameiro, Carlos Costa, esta mañá chegou puntual a unidade móbil para prestar o servizo bancario presencial tres días á semana, tal e como estaba previsto e serán os martes e xoves (de 9 a 14 horas en horario ininterrumpido) e mércores pola tarde, de 17 a 19 horas, así como os días 4 e 20 de cada mes (de 9 a 24 horas), coincidindo cos días de Feira.
Xa con anterioridade o pasado 24 de setembro técnicos de Abanca procederon a deixar totalmente operativo o Caixeiro Automático de última xeración con todas as funcións activadas como a retirada e ingreso de efectivo, pago de recibos e impostos con tarxeta ou libreta, transferencias e traspasos, solicitude de movementos, etc.
Desde primeira hora da mañá fóronse dando cita nas inmediacións da Praza do Concello un bo número de persoas, a maioría de idade avanzada, que precisaban facer xestións na unidade móbil bancaria estacionada nas inmediacións do Consistorio.
O alcalde Carlos Costa valorou positivamente que se recuperaran os servizos bancarios presenciais no municipio aínda que puxo en dúbida a eficiencia da medida por parte de Abanca xa que dispón de oficina en propiedade. “Certamente non vemos como lles pode resultar máis vantaxoso trasladar un autobús e tres operarios nesta unidade móbil en lugar de abrir a oficina que teñen aquí, perfectamente adaptada, amplia, moderna e con todas as comodidades e que era moitas veces atendida por unha soa persoa. En fin, son cousas que terán que analizar eles”, indicou o alcalde.
MELLORAR A ACCESIBILIDADE Á UNIDA MÓBIL DAS PERSOAS MAIORES CON PROBLEMAS DE MOBILIDADE
Tamén anunciou o rexedor que se poría en contacto cos responsables territoriais de Abanca para solicitarlle medidas que faciliten un mellor acceso á unidade móbil bancaria xa que presenta dúas escaleiras un tanto incómodas para as persoas con dificultades de mobilidade. “Pedirémoslles que faciliten a mobilidade e o acceso a persoas en cadeira de rodas porque estas escaleiras non parecen as máis axeitadas. A ver si poden colocar unha pequena rampla que favoreza a accesibilidade ao autobús”, sinalou o rexedor.
Finalmente, o alcalde agradeceu aos grupos da Corporación Municipal e aos veciños e veciñas a súa implicación na reivindicación dos dereitos de acceso aos servizos bancarios presenciais da veciñanza de Campo Lameiro e manifestou o seu desexo de seguir dialogando para convencer da idoneidade de reaperturar a oficina que Abanca ten na vila aínda que sexa cos horarios e os servizos agora acordados.
