• As reunións terá lugar mañá ás 16.00 horas na contorna da igrexa parroquial de San Paio e ás 17.45 horas nas inmediacións da de San Miguel e nas mesmas estará acompañada polo ex alcalde e presidente provincial do PP, Luis López, e polo membro da candidatura Pablo Cuñarro.
• Creo que é básico achegarse de xeito directo ás parroquias sobre todo para escoitar aos veciños e recoller as súas necesidades, que en moitas ocasións son pequenas cousas que melloran a súa calidade de vida e que teño o empeño absoluto de atender porque é de xustiza para o rural”, explicou a candidata.
A candidata do PP de Rodeiro, Cati Somoza, vai dar un paso máis na súa precampaña de cara ás eleccións municipais do 28 de maio co inicio dun percorrido de encontros veciñais por todo o rural do municipio “para manter un contacto directo e cercano cos veciños, que é o eixo da miña proposta política, e para escoitar, atender e recoller as súas demandas e necesidades”.
Estas reunións arrancarán mañá cunha dobre cita nas parroquias de San Paio de Senra, fixada para as 16.00 horas na contorna da igrexa parroquial, e de Riobó, onde a convocatoria está fixada para as 17.45 horas nas inmediacións do templo de San Miguel.
Nestes dous primeiros contactos, a candidata estará acompañada polo ex alcalde e presidente provincial do PP, Luis López, que lle manifestou a súa intención de acompañala na vintena de reunións polas parroquias se a súa axenda llo permite, e, neste caso, polo membro número 5 da candidatura, Pablo Cuñarro, xa que se trata da súa área territorial.
“Creo que é básico achegarse de xeito directo ás parroquias sobre todo para escoitar aos veciños. Vou co ánimo de presentarme e de falar pouco para centrarme en recoller as necesidades e suxestións dos veciños do noso rural, que é obviamente o groso do noso concello. As súas achegas son, en moitas ocasións, pequenas cousas sobre as pistas, o alumeado, a recollida de lixo ou as infraestruturas de auga que melloran moito a súa calidade de vida e que teño o empeño absoluto de atender de xeito case inmediato dende o goberno local, sempre que haxa dispoñibilidade, porque creo que é de xustiza para o rural”, explicou a candidata popular.
Cati Somoza explicou que a súa intención pasa por percorrer todas as parroquias de Rodeiro nun prazo estimado de dúas semanas, xa que, tras pechar a súa candidatura e ter deseñadas as propostas principais do programa electoral, quere recoller as peticións directas dos veciños do rural para incluilas no seu proxecto. O calendario completo de encontros veciñais irase dando a coñecer paulatinamente a medida que se vaia pechando, xa que a fixación de datas e horarios dependerá principalmente da dispoñibilidade da xente de cada parroquia.