O alcalde de Moraña, José Cela, recibiu esta mañá aos dez novos traballadores que durante
seis meses se unirán ao Concello de Moraña a xornada completa para levar a cabo distintos
traballos de mantemento.
Son dous conductores de camión, un albanel, 5 peóns forestais, un transportista e un
monitor de servizos á comunidade. Cela quixo darlles a benvida a Moraña, “onde espero que
poidades ter unha experiencia profesional moi enriquecedora, que vos axude a mellorar no
desempeño da vosa profesión e vos poida abrir oportunidades futuras”.
Cela afirma que desde o Concello “somos moi conscientes das necesidades laborais que hai
actualmente na sociedade e nós, como Administración, temos que ser proactivos e procurar
crear opcións de empregabilidade, postos de traballo aínda que sexan durante un tempo
acotado, no que as persoas poidan gañar experiencia e mellorar o seu perfil profesional”.
No caso dos dez traballadores que se incorporaron hoxe, estarán seis meses contratados a
xornada completa e permitirán, en palabras do alcalde, “que aínda melloremos máis a
prestación de servizos públicos”.
A contratación destas persoas fíxose con cargo ao Plan Concellos 2022 e como requisito
indispensable estaba que os posibles contratados estivesen dados de alta no Servizo
Público de Emprego de Galicia, co cal “démoslle unha oportunidade a dez persoas que
estaban en busca activa de emprego e que agora poderán ter uns ingresos estables durante
medio ano”.
Mellorar o emprego, obxectivo final do Goberno local
E é que tal e como lles trasladou Cela aos novos traballadores, o obxectivo que persegue o
Goberno local na súa xestión é o de potenciar a empregabilidade e fomentar que persoas de
Morañ ou de fóra dela poidan desenvolver o seu proxecto vital nesta vila, favorecendo a súa
inclusión laboral.
Neste sentido, o Concello tamén ten aberto o proceso de selección para candidatos á libre
oposición dunha praza de administrativo. “Despois de moitos anos, puidemos ampliar unha
praza nova e xerar así un posto de traballo máis, que tamén redundará nunha xestión máis
óptima a nivel municipal”, rematou Cela.