Manu Lourenzo: “Imos contruir o Soutomaior novo que merecemos, e o imos facer da man de toda a xente que lle quere a este concello e que sabe que Soutomaior merece moito máis”
Centos de veciños e veciñas desprazáronse onte ao Campo de San Benito, en Soutomaior, para apoiar a candidato do BNG á Alcaldía, Manu Lourenzo, no acto central da campaña na parroquia. Xunto ao portavoz municipal do BNG interviñeron os candidatos Óscar del Valle e Charo Bouzón, e a portavoz nacional do BNG, Ana Pontón.
Durante a súa quenda, Pontón subliñou que “sempre é un orgullo visitar Soutomaior”, sobre todo se é para “apoiar a Manu Lourenzo e unha candidatura de xente honesta, traballadora, que xunta experiencia e sangue novo”. “Con Manu Lourenzo, Soutomaior gana un alcalde que leva o seu concello e a súa veciñanza no corazón”.
“Un alcalde que construirá o futuro de Soutomaior da man de toda a xente que lle quere a este concello e que ten claro que Soutomaior merece moito máis”, sinalou a portavoz nacional do BNG, quen concluíu a súa intervención afirmando que “Manu Lourenzo non o fará só, senón que xunto a el ten o mellor equipo que nunca tivo Soutomaior, para levar adiante o mellor proxecto da historia deste concello”.
Pola súa parte, Manu Lourenzo asegurou que “imos contruir o Soutomaior novo que merecemos, e o imos facer da man de toda a xente que lle quere a este concello e sabe que merece moito máis. Este proxecto vai máis alá do BNG e da xente desta candidatura. Este proxecto vai de toda a veciñanza que é consciente do inmenso potencial de Soutomaior e que non se resigna a que sexamos o concello máis pobre da ría. Imos cambiar iso, e converteremos Soutomaior na envexa de todo o país”.
O candidato do BNG á Alcaldía explicou que “todos compartimos un proxecto común, o de darlle o futuro a Soutomaior que merece e que merecen os nosos fillos e fillas. Todos xuntos, traballando man con man e con Soutomaior no corazón, ímolo conseguir”.