Desde este venres, día 30, ata o domingo 1 de xulo, Redondela será sede do Campionato de España de Clubs de Base de fútbol sala. O pavillón municipal Manuel González Soto, de Chapela, acollerá os partidos da categoría Sub10 masculina, no que participa o IES Coruxo FS de Vigo xunto co EFS Humanes, da comunidade de Madrid, o CD Exposición, da Comunidade Valenciana e o Aljucer FS da Rexión de Murcia.
A alcaldesa de Redondela, Digna Rivas, presentou esta fase previa do torneo xunto ao concelleiro de Deportes, Iván Valles, o presidente do Comité Galego de FS, Julio Mougán, ademais de Fernando Rolland e Iván Sobrado, presidente e adestrador do IES Coruxo FS, respectivamente. Pola súa banda, as diferentes fases finais terán lugar os días 14 e 15 de xuño en sedes por determinar.
A alcaldesa salientou que Redondela demostra así unha vez máis o seu compromiso co deporte base, que achegará ao pavillón de Chapela a preto de 50 xogadores, aos que hai que sumar aos corpos técnicos e familias dos menores. Para Rivas é unha boa oportunidade para que os clubs que chegan desde Madrid, Valencia e Murcia poidan coñecer todos os atractivos deste municipio e a enseada de San Simón, “que é a xoia da Ría de Vigo”.
