- Creación de vivenda social
- Dous novos centros de día en Xinzo e Guláns
- Dixitalización do conservatorio municipal e reforma da Baixada de San Gregorio, entre outros proxectos
O Concello de Ponteareas adiantou a colectivos veciñais, xuvenís e sociais os proxectos incluídos no Plan de Actuación Integrado (PAI) que o Concello presentará á nova convocatoria de fondos FEDER da Unión Europea. Un documento estratéxico que permitirá avanzar en grandes proxectos e que optará ao máximo dos fondos permitidos, un total de 15 millóns de euros.
O Plan de Actuación Integrado (PAI) contempla proxectos sociais, de dinamización económica, de solucións TICs e medioambientais, entre outros. O PAI de Ponteareas contempla importantes proxectos como a dotación de vivenda social a través da adquisición e recuperación de vivenda baleira para destinala a este fin.
Outros dos grandes investimentos está na atención aos maiores, unha acción que implica a descentralización de servizos públicos sociais como a construción dun centro de día na parroquia de Xinzo e outro na parroquia de Guláns. Dous centros de día para que achegarán novos servizos ás parroquias con investimentos de máis dun millón e medio de euros cada un.
O documento recolle tamén a dixitalización do conservatorio municipal de música, a renaturalización da praza Bugallal con elementos vexetais e zonas de sombra, a reforma da baixada de San Gregorio e contorna, a rehabilitación do edificio de servizos sociais da rúa Oriente para mellorar a súa eficiencia enerxética e reorganizar os espazos, a nova ubicación do servizo de Atención Temperá e novos equipamentos para a nova praza de abastos.
Ademais, este documento estratéxico que determinará os vindeiros cinco anos inclúe a modernización da administración local cun visor web interactivo para consultar o PXOM e unha carpeta cidadá.
A liña catro que engloba patrimonio urbano, turismo e cultura comprende a obra da nova biblioteca pública municipal e a mellora da contorna así como a renovación do museo de Ponteareas.
A concelleira de Urbanismo e Axenda 203, Silvia Fdez. Táboas, destaca a relevancia do documento que pon en iniciativas que impacten positivamente no día a día da poboación. “Estas axudas valorarán proxectos xa madurados que poidan ser executados nestes cinco anos, motivo polo que tendo en conta as aportacións das veciñas e veciños na primeira rolda de participación, recóllense aqueles proxectos máis viables”.
O documento do PAI estará dispoñible na páxina web para a súa consulta.
