- O Pleno municipal dá luz verde á rehabilitación integral do antigo Mercado de Abastos para convertelo nunha moderna biblioteca pública.
- Coa aprobación do proxecto, o Concello poderá continuar cos trámites administrativos necesarios para a licitación e contratación das obras, cuxo prazo de execución previsto é de 18 meses.
- Constitúe o proxecto de maior envergadura económica do Plan EDIL «Ponteareas, espazo sostible para crecer e vivir», cofinanciado con fondos europeos FEDER.
O Pleno do Concello de Ponteareas aprobou este martes o proxecto básico e de execución da nova Biblioteca Pública Municipal, dando un paso decisivo para facer realidade un dos investimentos máis importantes dos últimos anos no municipio.
O proxecto, cun orzamento de 7.813.027,98 euros (IVE incluído), contempla a rehabilitación integral do edificio do antigo Mercado de Abastos, situado na rúa Perillana número 4, para transformalo nun moderno equipamento público destinado á cultura, a lectura, o estudo e o coñecemento. Trátase da actuación de maior importe económico incluída no Plan EDIL de Ponteareas, unha iniciativa estratéxica de transformación urbana que conta con cofinanciación do Fondo Europeo de Desenvolvemento Rexional (FEDER).
A nova biblioteca permitirá recuperar para o uso público un dos inmobles máis representativos do centro urbano, dotándoo dunha nova función cultural e educativa e converténdoo nun espazo de referencia para a veciñanza de Ponteareas.
As novas instalacións contarán cunha superficie de máis de 2.500 metros cadrados, o que supón cuadriplicar o espazo que viña utilizándose ata o de agora. Este incremento de superficie permitirá albergar amplas salas de lectura e estudo, espazos polivalentes para actividades culturais e áreas específicas de socialización, concibidas baixo o modelo de “espazo vivo” e ágora cultural para toda a cidadanía.
A alcaldesa, Nava Castro, destacou a importancia da aprobación deste proxecto para o futuro do municipio: «Hoxe damos un paso fundamental para facer realidade un dos proxectos máis importantes de Ponteareas. Non falamos unicamente de rehabilitar un edificio, senón de recuperar un espazo emblemático e poñelo ao servizo da cultura, a educación e as futuras xeracións». A rexedora subliñou que «a nova biblioteca representa a nosa aposta por un municipio que invirte en equipamentos públicos, recupera o seu patrimonio e xera novas oportunidades para a cidadanía».
O maior investimento do Plan EDIL
A nova Biblioteca Municipal forma parte do Proxecto 9 do Plan de Actuación Integrado «Ponteareas, espazo sostible para crecer e vivir», desenvolvido no marco do programa EDIL. Cun orzamento superior aos 7,8 millóns de euros, constitúe a actuación de maior envergadura económica deste plan e unha das principais apostas do Goberno municipal para a modernización dos equipamentos públicos e a recuperación del patrimonio urbano.
A concelleira de Urbanismo, Silvia Fernández Táboas, sinalou que «a aprobación do proxecto supón culminar unha fase fundamental de traballo técnico e administrativo, que nos permite avanzar cara á contratación e posterior execución das obras». O proxecto foi redactado polo arquitecto Javier Couto Granja, de LIQE arquitectura. Coa aprobación do mesmo por parte do Pleno, o Concello poderá continuar cos trámites administrativos necesarios para a licitación e contratación das obras, cuxo prazo de execución previsto é de 18 meses.
O Goberno municipal considera esta actuación un investimento estratéxico para o futuro de Ponteareas, tanto pola súa dimensión económica como polo seu impacto cultural, educativo e urbano. A recuperación do antigo Mercado de Abastos permitirá dar unha nova vida a un edificio emblemático, ao tempo que se amplían e modernizan os espazos públicos destinados á cidadanía.
«Queremos que Ponteareas conte cunha biblioteca á altura das súas necesidades, un espazo moderno, accesible e preparado para converterse nun punto de encontro cultural e educativo. Con esta aprobación damos un paso decisivo para converter ese obxectivo nunha realidade», concluíu a alcaldesa, Nava Castro.
O Concello de Ponteareas continúa así avanzando na execución dos proxectos estratégicos do Plan EDIL, co obxectivo de transformar o municipio, mellorar os seus equipamentos públicos e construír unha vila con máis servizos e oportunidades para os seus veciños e veciñas.
