• Permitirá que os colectivos sociais e veciñais da parroquia poidan utilizar o antigo cine-baile de Carballedo reconvertido nun moderno e funcional edificio de 477 m2 distribuídos en dúas plantas
O alcalde de Cerdedo-Cotobade, Jorge Cubela, acompañado polo delegado territorial da Xunta en Pontevedra, Luís López, e varios membros do equipo de goberno inspeccionaron o tramo final das obras de execución da reconversión do antigo cine-baile de Carballedo no
moderno e funcional Centro Cultural e Turístico “Antonio Fraguas”, que consta cun investimento duns 486.000 euros que permitirán poñer adisposición da veciñanza e dos colectivos socioculturais da parroquia 477 metros cadrados distribuídos en dúas plantas dun edificio totalmente equipado.
O alcalde, Jorge Cubela, manifestou que afrontaba con moita ilusión os remates finais desta obra que “vai supoñer un antes e un despois para o asociacionismo local e os colectivos socioculturais e veciñais de Carballedo xa que ven a dar resposta a unha grave carencia de infraestruturas para a veciñanza. Calquera xuntanza de certo número de persoas tíñase que
desenrolar no pavillón de deportes, nunhas condicións de audición e comodidade inadecuadas. Agora, a partir de que se inaugure este Centro as cousas van mudar substancialmente”, indicou o rexedor.
O edificio que albergará ao futuro Centro Cultural e Turístico “Antonio Fraguas” está rodeado de moita emotividade para os veciños de Carballedo xa que se erixe sobre o antigo cine-baile, un punto de encontro de xeracións pasadas e que resultaba un edificio emblemático para a veciñanza polo que “tivemos que afrontar un proxecto de modernización e recuperación tendo moi en conta o pasado e o recordo do cariño con que os nosos veciños se referían a el. Por todo isto tivemos que harmonizar esa lembranza cun novo edificio moderno e funcional polo que decidimos empregar materiais nobres, como madeira ou zinc, e outros máis actuais, entre os que figuran aluminio, aceiro e formigón.
Respectouse a súa fisonomía, ao tempo que se abriron grandes ocos na estrutura para favorecer a ventilación e a iluminación natural e dotouse de infraestruturas de novas tecnoloxías”, explicou Jorge Cubela.
O Centro Cultural e Turístico Antonio Fraguas terá unha superficie de 477 m² distribuídos en dúas plantas cun amplo vestíbulo para recepcións, exposicións e punto de información turística, unha aula formativa polivalente e multifuncional con 55 m² e, xa no primeiro andar, unha gran sala diáfana con 150 m² e capacidade para ata 130 persoas apta para a
celebración de eventos.
