• O alcalde salientou a idoneidade deste tipo de iniciativas para favorecer que se fixe a poboación e ratificou o seu desexo de impulsar este tipo de actuacións para facilitar que moitas familias aposten polo mundo rural
O alcalde de Cerdedo-Cotobade, Jorge Cubela, acompañado pola tenente de alcalde Lourdes Ovelleiro, inspeccionaron os traballos realizados no pastizal de Deán, cunha extensión dunhas 30 hectáreas, e no que a Dirección Xeral de Gandeiría da Xunta de Galicia investiu uns 300.000 euros.
Entre as actuacións levadas a cabo nesta infraestrutura agrogandeira figuran o peche perimetral do entorno, a dotación de comedeiros, fíxose o desbroce de todas as parcelas e realizouse o sementado para logo incorporar ás vacas para que puideran acceder ao pasto.
Segundo manifestou o alcalde, Jorge Cubela, está é outra das iniciativas impulsadas desde o Concello de Cerdedo-Cotobade para dinamizar as posibilidades de desenrolo económico sostibles no municipio e que ven a dar continuidade a outras iniciadas xa.
A esta aposta polo mundo rural hai que sumar a primeira aldea modelo da provincia de Pontevedra, Parada-Mouteira, o poligono agrario de Tomonde e Vilalén, de 70 hectáreas adicadas á produción de mazáns para sidra, o pastizal de Valongo, Loureiro e Caroi e o proxecto europeo pioneiro na prevención de incendios (Forvalue) co que se está a traballar en Parada de Tenorio.
“Estamos realizando unha aposta seria e decidida polo mundo rural para que a nosa xente teña posibilidades e poida quedarse no territorio. Deste xeito non so se fixa poboación senón que atopamos no medio natural un recurso económico para que moitas familias atopen no aproveitamento agrogandeiro das nosas terras un xeito de vida”, indicou o alcalde de Cerdedo-Cotobade, Jorge Cubela.
O rexedor agradeceu tamén á Dirección Xeral de Gandeiría, Agricultura e Industrias Agroalimentarias, José Balseiros, a súa implicación e colaboración na posta en marcha destas iniciativas que non so lle dan unha segunda vida aos montes senón que son unha oportunidade real de empregabilidade e rendemento económico para as familias que deciden apostar polo rural e por este tipo de actividades agrogandeiras.
