ESTE CERTAME DE CAZA, PESCA E NATUREZA CELEBRARÁ A SÚA CUARTA EDICIÓN DO 8 AO 11 DE XUÑO DE FORMA PARALELA Á FEIRA INTERNACIONAL ABANCA SEMANA VERDE DE GALICIA
A IX Feira de Caza, Pesca e Natureza, Fecap Abanca 2023, a cal se celebrará do 8 ao 11 de xuño xunto á feira Abanca Semana Verde, volverá ser punto de encontro de empresas e afeccionados.
En canto á súa área expositiva, contará con produtos e servizos para a práctica destas actividades, destacando a presenza de diversas armerías. Respecto ao seu programa de actividades, terán gran protagonismo as propostas relacionadas coa caza, na súa maioría realizadas pola Federación Galega de Caza.
Levaranse a cabo exhibicións participativas de tiro con arco nas que poderán intervir todos os interesados. Sumaranse competicións como as probas oficiais da liga Autonómica de Agility e tamén a Copa Federación Abanca Semana Verde de Galicia. Celebrarase ademais a III Presentación de Cans de Caza, na cal se irán mostrando de forma individual numerosos exemplares de diversas razas de caza tanto maior como menor, á vez que o presentador, Rafael Sánchez Malvar, explicará aspectos como as súas características, procedencia, calidades e para que modalidade de caza son máis axeitados.
Para os máis novos haberá demostracións de agility e habilidades caninas e tamén un biotopo, cunha área pensada para recuperar os coellos de monte, cuxa poboación está minguada como consecuencia de enfermidades, unha na que se poderá ver nunha incubadora a eclosión de ovos de perdiz e outra na que se mostrarán diversas especies cinexéticas que se utilizan para repoboar. Ademais, haberá un taller permanente de pintura sobre fauna galega e modalidades de caza impartido pola pintora mindoniense Irma María Loureiro, e entre cuxos participantes se sorteará un retrato personalizado en óleo.
Ademais, repetirá o simulador “Sim Way Hunt”, un sistema virtual para aprender a adestrar o tiro sobre obxectivos en movemento con gran éxito entre o público.
Por outra banda, a Mesa Galega pola Caza contará cunha exposición de trofeos de caza.
Actividades de cetrería
Durante o certame levaranse a cabo exhibicións de voo de aves de cetrería, ademais dunha exposición permanente de exemplares e actividades para nenos. Así mesmo, a cetreira Nuria Gallego estará coa súa aguia de Harris, chamada Hermione, dando a coñecer ao público as súas virtudes para a cetrería.
