A institución provincial destinará 215.000 € para sufragar a prestación directa do Servizo de Axuda no Fogar (SAF) e outros 215.000 € para cubrir os custos do persoal dos Servizos Sociais Comunitarios en sete concellos
A Deputación de Pontevedra acaba de aprobar achegas por valor de 430.000 euros do Plan de Cofinanciamento dos Servizos Sociais Comunitarios Municipais para sete concellos de menos de 20.000 habitantes das comarcas do Deza e Terra de Montes. Son 215.000 € para sufragar a prestación directa do Servizo de Axuda no Fogar (SAF) e outros 215.000 € para cubrir os custos do persoal dos Servizos Sociais Comunitarios.
En concreto, dos 215.000 euros para sufragar o SAF, un servizo que atende a persoas maiores e con discapacidade, especialmente cando carecen de apoio persoal no seu medio inmediato, Agolada recibe 31.098 €, Cerdedo-Cotobade 39.999 €, Dozón 22.332 €, Forcarei 27.058 €, Rodeiro 19.378 €, Silleda 41.312 € e Vila de Cruces 33.802 €. Ademais, os outros 215.000 € para cubrir os custos do persoal dos Servizos Sociais Comunitarios divídense en 30.632 € para Agolada, 30.632 € para Cerdedo-Cotobade, 30.632 € para Dozón, 19.506 € para Forcarei, 20.879 € para Rodeiro, 41.757 € para Silleda e outros 41.757 € para Vila de Cruces
No conxunto da provincia, a institución provincial destinou un total de 3 millóns de euros para axudar aos concellos a sufragar ambos servizos, unha cifra que se reparte entre 1,2 millóns para o Servizo de Axuda no Fogar e outros 1,8 millóns para cubrir os custos do persoal dos Servizos Sociais Comunitarios.
