· A iniciativa presentada propuña que se lle remitira ao facultativo sanitario recén xubilado un escrito de recoñecemento polo seu labor de máis de tres décadas no centro de saúde pontecaldelán.
· O alcalde opúxose a que se lle rendera unha homenaxe pública na que se lle fixera entrega dunha placa conmemorativa do remate do seu periplo laboral sanitario en Ponte Caldelas.
O Partido Popular de Ponte Caldelas lamenta profundamente que o alcalde Andrés Díaz e o Grupo Municipal Socialista votara en contra dunha iniciativa presentada no Pleno para que a Corporación, no nome da veciñanza de Ponte Caldelas, fixera recoñecemento e agradecemento a José Manuel Carrera Ligera, o Doutor Carrera, recentemente xubilado tras 34 anos ininterrumpido de servizo á veciñanza deste municipio no seu Centro de Saúde.
Os votos en contra dos 8 concelleiros socialistas, fronte aos 3 do PPdeG e os 2 do BNG que o fixeron a favor, foi rexeitada esta moción que a oposición pretendía debatila no Pleno ante a seguridade de que prosperaría por unanimidade ao tratarse dun recoñecemento público e notorio a unha persoa de sobrada consideración entre a veciñanza pontecaldelá e que pertence a un colectivo, o sanitario, que durante a pandemia da Covid-19 foi exemplar na atención á cidadanía e na loita en primeira liña fronte ao coronavirus.
A proposta presentada ao Pleno recoñecía a traxectoria profesional así como a calidade humana do Doutor Carrera que ao longo de 34 anos realizou unha grande aportación humanitaria e de servizo público a través da sanidade no municipio. Ademais, na moción se recordaba os valores altruístas e de implicación social e persoal do Doutor Carrera en causas sociais ou de recuperación do patrimonio cultural e relixioso do municipio formando parte da comisión encargada de impulsar a restauración da igrexa e do entorno da igrexa parroquial de Santa Baia de Ponte Caldelas.
A proposta de acordo achegada ao Pleno recollía no seu texto o seguinte acordo: “Instar ao Goberno Local a realizar, en nome da Corporación Municipal de Ponte Caldelas, unha merecida homenaxe pública ao Doutor Carrera no que se lle faga entrega dunha placa conmemorativa dos 34 anos de servizo sanitario e atención á veciñanza de Ponte Caldelas. E instar ao alcalde, en nome da Corporación Municipal do Concello de Ponte Caldelas e dos veciños e veciñas do municipio, a remitirlle un escrito oficial de recoñecemento aos servizos prestados á veciñanza e felicitándoo pola súa recente xubilación”.
PETICIÓN DE APLAUSO PARA OS CONCELLEIROS DO BNG QUE REMATAN O SEU PERIPLO POLÍTICO NA CORPORACIÓN E REITERAR A CONVOCATORIA DUNHA XUNTA DE VOCEIROS PARA RENDIR HONORES A PERSOEIROS DO MUNICIPIO
Ante esta contrariedade, tanto os voceiros do PPdeG como do BNG volveron solicitar do alcalde a convocatoria da comprometida Xunta de Voceiros para consensuar o rendemento de honores a persoeiros do municipio, tal e como se acordara a finais da pasada lexislatura e que segue sen ser convocada polo alcalde. Nese acordo establecíase a necesidade de consensuar de nomes para o rueiro municipal e rendir a homenaxe merecida a persoeiros como o cineasta Chano Piñeiro ou o pintor Carlos García, entre outros moitos.
Finalmente, no remate do Pleno no que se deu conta da renuncia ás súas actas dos concelleiros do BNG, Lito Muíños e Manolo Barreiro, ante a ausencia de petición dun aplauso polo seu periplo de representación no Concello e pola súa vocación de servizo público amosado nas últimas dúas décadas, o voceiro do PPdeG, Antón Xil, solicitou públicamente ese honor para estes edís pola súa traxectoria política, o respecto amosado sempre aos membros da Corporación, as súas aportacións, o seu traballo e polo seu talante democrático, que foi seguido unánimemente polo público presente no Salón de Plenos e pola propia Corporación Municipal.