– A alcaldesa de Redondela rexeita rotundamente as críticas do grupo municipal do PP en relación ao funcionamento dos Campamentos Municipais de Conciliación, “a ratio de nenas e nenas por monitor cúmprese escrupulosamente, e na maioría dos campamentos hai máis persoal do que correspondería”.
– Rivas lamenta que o PP faga oposición “difamando este servizo” e advirte que “no seu afán por atacar ao goberno local poñen en tela de xuízo a uns profesionais que fan unha magnífica labor”. A empresa concesionaria “cumpre rigorosamente co prego de condicións, ten máis de 20 anos de experiencia no sector e non é xusto que por un interese partidista o PP cuestione o seu traballo con acusacións falsas”.
A alcaldesa de Redondela, Digna Rivas, rexeita rotundamente as críticas do grupo municipal do PP en relación ao funcionamento dos Campamentos Municipais de Conciliación. “A ratio de nenas e nenas por cada monitor ou monitora cúmprense escrupulosamente, e na maioría dos campamentos supéranse amplamente”. Como exemplo, no do campamento que se celebra esta quincena no Conservatorio municipal hai 7 monitores para un total de 49 rapaces. No mes de xullo, cando o número de nenos e nenas era de 62, os monitores eran 8 “o que supera con moito a ratio legal dun monitor por cada 15 participantes”.
En canto á programación de actividades que se realizan nos campamentos, existe un cronograma que se lles traslada ás familias con actividades diferentes cada día, en función das idades dos nenos e nenas. Rivas desminte que existan denuncias das familias, ao contrario “todos os comentarios que recibimos das familias son moi positivos, e a rapazada está a pasalo moi ben coas actividades”.
Rivas lamenta que o grupo popular faga oposición “difamando un servizo tan sensible como os campamentos de conciliación” e advirte que en política “non todo vale”. Advirte que o PP “no seu afán por atacar ao goberno local está a poñer en tela de xuízo a uns profesionais que fan unha magnífica labor”. A alcaldesa explica que a empresa concesionaria do servizo este verán “cumpre rigorosamente con todo o esixido no prego de condicións”. Trátase dunha empresa moi recoñecida no sector, con máis de 20 anos de experiencia organizando campamentos en Concellos como Vigo, O Porriño, Mos, Baiona ou Tui, entre outros. “Non é de xustiza que por un interese partidista o PP estea a cuestionar o servizo con acusacións que son falsas”, conclúe a alcaldesa.
No Programa Municipal de Conciliación participan preto de 500 nenos e nenas ao longo do verán. Desde a chegada ao goberno local de Digna Rivas o servizo ampliouse ao mes de agosto, xa que anteriormente os campamentos só se celebraban en de xullo. Tamén se ampliou o programa de conciliación ás parroquias, con campamentos en Cedeira, Cesantes, Chapela, Quintela, Porto Cabeiro, Reboreda e Redondela, “nunha aposta decidida por achegar os servizos a toda a veciñanza, tanto na vila como nas parroquias”, explica a rexedora.
