• O pacto de investidura de Pedro Sánchez incluía desbloquear a segunda fase das obras, pero “o PSOE desdeñou o proxecto coa complicidade absoluta do BNG de Lores”
• O PP da capital endurece as súas críticas despois de meses de “silencio cómplice” entre os socialistas e nacionalistas
O presidente e portavoz municipal do PP de Pontevedra, Rafa Domínguez, endurece as súas críticas este domingo e volve esixir que se termine o paseo peonil entre a capital da provincia e Marín, despois de que o Goberno de España anunciase en abril que non realizaría o segundo tramo, entre Ence e Vos Praceres, porque infrinxiría a lexislación actual da Lei de Costas.
Un mes despois, o Ministerio de Transición Ecolóxica retractábase e informaba de que se estaban estudando dúas alternativas para continuar o paseo, abrindo a posibilidade de elevar e desprazar a autovía de Marín cara a Ence. Desde ese momento, non houbo ningunha novidade sobre a continuidade do proxecto.
“Desde o PP, esiximos que se poña en marcha o tramo final dunha vez. Unha segunda fase que o PSOE desdeñou coa complicidade absoluta do BNG e de #Miguel Anxo Fernández Lores”, afirmou Domínguez en referencia ao pacto de investidura de Pedro Sánchez co Bloque, en novembro de 2023, no que acordaran que, unha das condicións para apoiar ao socialista en Madrid, era desbloquear o remate do paseo a Marín.
Case un ano despois, “o BNG e o PSOE seguen tapándose as súas vergoñas porque son cómplices e socios de meter este proxecto, que o PP e a ministra Ana Pastor deixaran perfectamente perfilado, nun caixón, cando tería que estar xa terminado”.
O xefe da oposición pontevedresa manterá a súa batalla política para que os miles de pontevedreses, que pasean a diario pola avenida de Marín, poidan completar o percorrido que as administracións comprometeran desde hai máis de 20 anos.
Considera prioritario investir na fachada marítima da cidade do Lérez dentro do proceso de humanización da contorna, coa creación, por parte da Xunta de Galicia, dunha senda peonil e ciclista de 3,51 quilómetros entre Mollavao e Vos Praceres. A Deputación de Pontevedra tamén anunciará proximamente novidades.