• O líder do PP cualifica de “fracaso absoluto” a implantación do Coche de Punto do BNG que só opera de luns a venres, de 7:00 a 14:00 horas, cunha media de 8,5 viaxes ao día, despois de 343.000€ de investimento inicial e 10 anos de atraso
• A proposta de Domínguez para dotar ao rural de liñas regulares de autobuses con frecuencias diarias e para aumentar os aparcamentos disuasorios “permitiríanos reducir o uso do vehículo privado, diminuír a conxestión do tráfico, contribuír a unha menor contaminación e estimular a cidade como punto de actividade económica comercial”
O presidente local e portavoz municipal do Partido Popular de Pontevedra, Rafa Domínguez, esixiu ao Goberno local que tome medidas urxentes para mellorar o transporte público entre as parroquias e o centro urbano, despois de cualificar de “fracaso absoluto” os primeiros meses de implantación do servizo de transporte a demanda Coche de Punto do BNG.
Domínguez defendeu a súa proposta electoral para dotar ao rural pontevedrés dun servizo de transporte público de calidade, baseado en liñas regulares de autobuses con frecuencias diarias. “Esta iniciativa permitiría reducir o uso do vehículo privado, diminuír a conxestión do tráfico, mellorar a eficiencia dos desprazamentos e contribuír a unha menor contaminación acústica e ambiental. Ademais, favorecería o aforro económico dos veciños e estimularía a actividade económica local, grazas a unha mellor conexión entre as parroquias e os principais servizos de Pontevedra”, explicou.
Respecto ao Coche de Punto, o líder dos populares na cidade criticou o seu funcionamento e cuestionou a eficacia dun investimento inicial de 343.270,95 euros no desenvolvemento do servizo e da súa aplicación informática, cando a maioría de usuarios opta por solicitar o transporte vía telefónica por resultar máis cómodo.
Doutra banda, denunciou que o transporte a demanda do BNG só opera de luns a venres, de 7:00 a 14:00 horas, e non permite desprazamentos entre parroquias, o que limita a súa utilidade real. “O invento do BNG, anunciado como un modelo pioneiro a exportar ao mundo, supuxo un pasteiro e está a ser un fracaso absoluto de uso cunha media de 8,5 viaxes ao día – 166 ao mes – para unha poboación potencial de 20.000 persoas repartidas nas 15 parroquias do municipio”, sinalou.
O xefe do PP de Pontevedra lamentou que, se se cumpren os vaticinios do concelleiro de Movilidad, César Mosquera, o custo anual do Coche de Punto roldará os 20.000 euros ao peche de 2025, o que representaría menos do 9% do orzamento asignado (230.000€) nos Orzamentos municipais do BNG, aprobados co voto a favor do PSOE.
Ademais, incidiu en que, desde a introdución da cobranza polo servizo, o pasado 17 de febreiro, a demanda descendeu.
“Lores debe deixar de lado os experimentos e apostar por solucións reais como establecer liñas de autobús regulares, como existen en calquera cidade, e mellorar os aparcamentos disuasorios, para facilitar que os veciños do rural poidan desprazarse con facilidade ao centro”, engadiu.
Finalmente, criticou a xestión económica do Goberno do BNG “que dilapidou centos de miles de euros en proxectos como o Coche de Punto, o alugueiro dos terreos da Canicouva para unha planta de compostaxe que segue sen realizarse ou o skatepark desmontable de Raíña Victoria”, concluíu Domínguez.
