• O gañador das recentes eleccións, pronunciouse sobre o futuro de Pontevedra e os retos que se aveciñan no próximos catro anos. “Non teño dúbidas de que o BNG e o PSOE pactarán, aínda que non se aguanten”
• Domínguez: “O noso compromiso con cada medida presentada segue vixente. Teño curiosidade por saber que pasará con Raíña Vitoria, con quen se baixará os pantalóns. Se o PSOE ou o BNG”
O presidente do Partido Popular de Pontevedra e vencedor das eleccións municipais, Rafa Domínguez, compareceu este mércores para pronunciarse sobre o futuro de Pontevedra e os retos que se aveciñan no próximos catro anos. O popular defendeu que con “un sólido respaldo electoral, o Partido Popular posiciónase como a forza líder no municipio, mentres o BNG e o PSOE tentan agora selar un pacto de perdedores”.
Durante a pasada campaña, Rafa Domínguez presentou un ambicioso conxunto de propostas deseñadas para impulsar o desenvolvemento e o benestar en todos os recunchos da cidade. Un programa político “que elixiron por maioría os pontevedreses” e que, para o popular, non levará a cabo “ao haber un previsible pacto entre o BNG e o PSOE”.
“O respaldo masivo dos votantes nas urnas outórganos un mandato claro para levar a cabo estas propostas e traballar incansablemente polo progreso de Pontevedra. É lamentable ver como o BNG e o PSOE, derrotados nas eleccións, buscan unirse nun pacto de perdedores, en lugar de respectar a vontade dos cidadáns”, mantivo o popular.
Domínguez mostrouse crítico cos acordos que se poderán tomar nas conversacións entre o BNG e o PSOE: “No próximos catro anos poderemos ter un alcalde e un tenente de alcalde que non teñen nin boa relación nin ningunha afinidade”.
Domínguez fixo un percorrido polas propostas dos populares que non levarán a cabo de formalizarse o acordo entre as outras formacións. “O noso compromiso co rural, a mellora dos barrios, o fomento do deporte, a revisión da carga impositiva, a actualización do PXOM, a atención aos servizos sociais e a apertura de Pontevedra á ría, son só algunhas das iniciativas crave que incluímos no noso programa e sabemos que se o BNG e o PSOE gobernan non levarán a cabo”, defendeu.
En relación á cuestión da reapertura de Raíña Vitoria, Domínguez preguntouse: “Quen se baixará os pantalóns? O BNG ou o PSOE? É evidente que a cidade espera unha resposta clara e unha actuación decidida en favor dos intereses de Pontevedra. Vai seguir pechada en contra de todo o que dixo o PSOE? Vai reabrir en contra do BNG?”.