• O líder dos populares da cidade presenta unha moción para preservar, musealizar e poñer en valor a imaxe deste enclave histórico na praza de Valentín García Escudeiro
• O PP de Pontevedra lamenta os anuncios incumpridos do goberno do BNG que, desde as escavacións de 2006, acumulou “sucesivas promesas de recuperación que se quedaron en papel mollado”
O portavoz municipal do Partido Popular de Pontevedra, Rafa Domínguez, acompañado polo concelleiro do PP local Iago Acuña, presentou na praza de Valentín García Escudeiro a súa proposta para impulsar a recuperación, posta en valor e musealización do xacemento arqueolóxico da ponte do Burgo.
Domínguez denunciou o abandono deste espazo emblemático por parte do Goberno do BNG e defendeu a necesidade dunha actuación integral para mellorar a súa conservación e impulsar a súa divulgación a través dunha moción coa que “buscamos a preservación dos restos arqueolóxicos, garantindo a súa conservación para as futuras xeracións; musealizar o xacemento, para que veciños e visitantes poidan comprender a súa importancia histórica; realizar unha reforma estética; que dignifique o espazo, mellore a iluminación e convértao nun referente do patrimonio arqueolóxico de Pontevedra”.
Durante a súa intervención, tamén lembrou a importancia histórica do xacemento, onde se acharon vestixios da Época Romana, como os miliarios dedicados aos emperadores Adriano e Maximino Daya, así como elementos medievais como restos dos arcos da ponte do século XII, o dique portuario do século XV, fragmentos da muralla moderna do século XVI ou os restos do primeiro mercado de abastos da capital da provincia.
Por todo iso, o líder da oposición lamentou que, desde o inicio das escavacións de 2006, “as sucesivas promesas de recuperación quedáronse en papel mollado”. Entre os anuncios incumpridos, o Concello convocou un concurso de ideas en 2008 para construír un Centro de Interpretación, cun orzamento de 3.000.000€, que non se fixo, tras descartar previamente un Museo da Historia da cidade, por 10.000.000€, que tampouco levou a cabo.
En 2013, en lugar de protexer o xacemento, o goberno do BNG decidiu soterrar máis do 40% da escavación. En 2017, a única actuación foi a instalación de catro ventás e unha leve mellora da iluminación, claramente insuficiente para o Partido Popular. Finalmente, en 2023, tras anos de abandono, limitáronse a colocar catro paneis informativos de vinilo, sinalou o portavoz do PP.
O partido máis votado da cidade considera que a situación actual do xacemento é inaceptable e que o Concello relegou a súa posta en valor a un segundo plano. “Non cumpre cos requisitos de preservación histórica nin os estándares estéticos mínimos. Non é a imaxe que queremos trasladar aos peregrinos que chegan da ponte do Burgo, un enclave fundamental do Camiño de Santiago e do centro histórico da cidade”, afirmou Domínguez.
Con esta iniciativa, o PP de Pontevedra busca o consenso de todas as forzas políticas para recuperar un espazo que, segundo defenden, debe ser un orgullo para Pontevedra e un punto de referencia para veciños e peregrinos.
