O goberno do PP vai seguir coas súas políticas para a galería ou vai a atallar os problemas do saneamento do noso concello, son problemas reais que poden afectar á saúde dos veciños e veciñas
En reiteradas ocasión o BNG da Estrada, a través dos concelleiros Xoan Reices e Ricardo Camba, avisamos dos problemas das arquetas dos sumidoiros preto da praia fluvial, tamén, en xeral en toda a rede de sumidoiros da vila, que periodicamente bota por fóra todo tipo de desperdicios.
A resposta do goberno municipal do PP foron boas palabras e a pesar de recoñecer o problema non se tomaron medidas para atallar estes verquidos, que, como dixemos, poderían afectar á saúde pública.
Pois a pesar dos avisos do BNG da Estrada, xa temos as consecuencias: a praia fluvial do Liñares pechada ao baño temporalmente porque se detectaron bacterias fecais por enriba do permitido. E agora que? Que vai facer o goberno do PP, seguir mirando para outro lado ou solucionar os problemas dos sumidoiros, un problema de primeira necesidade que afecta, como vemos, á saúde dos veciños e veciñas?
O PP leva instalado desde hai ano en políticas efectistas para a galería, porque sabe que iso élle rendíbel electoralmente, mentres descoida os problemas reais dos veciños e veciñas. Así é que máis do 80% das parroquias do rural están sen saneamento, e así é que tamén son habituais as multas de Augas de Galicia polos vertidos da EDAR ao río. Está claro que ao concello non lle doen o cartos das multas, xa que pagamos entre todos e todas, pero tampouco a saúde dos veciños e veciñas.
