Son varias as noites nas que distintos puntos do concello se atopan a escuras.
O BNG de Meaño solicita o arranxo inmediato das fallas no alumeado público que dende varios días afectan a distintos lugares do concello. A veciñanza afectada puxo en coñecemento da Alcaldía a falta de luz na vía pública mais o rexedor Carlos Viéitez non deu solución ao problema.
Dende a agrupación lembran que o Goberno Municipal ten a obriga de garantir alumeado en todo o concello, pois todos os veciños e veciñas pagan os mesmos impostos. Inciden en que o alumeado público é un dereito da veciñanza que se fai aínda máis preciso no outono e no inverno.
O BNG de Meaño denuncia o descoido do rural e defende que é preciso coidar os servizos básicos que proporcionan seguridade e comodidade aos veciños e veciñas que viven nel.
En invernos anteriores solicitaron en repetidas ocasións a suxeición dos colectores do lixo que se deitan co vento espallando os residuos e se desprazan cara á estrada co temporal e temen agora que a esta problemática se engada a falta de luz na vía pública.
