• O concelleiro do Partido Popular de Pontevedra Pablo Fernández lembrou que a recepción dos terreos por parte do Concello produciuse en 2020 e a día de hoxe, “non se moveu nin unha soa pedra”
• En 2021, o Goberno local comprometeuse a dar inicio ás obras: “Non hai obra municipal exenta de atrasos e problemas, pero neste caso, a gravidade do asunto parécenos que excede do tolerable”
O concelleiro do Partido Popular de Pontevedra Pablo Fernández quixo valorar a situación xerada despois de coñecerse que o Concello volve sacar a licitación a obra do campo de fútbol de Salcedo. “Parécenos unha tomadura de pelo un novo atraso, partindo da base que a recepción dos terreos por parte do Concello produciuse en 2020 e a día de hoxe, seguen tal cal como entón”, explicou o popular. Esta obra prometeuse levar a cabo en 2015.
“As obras do Concello prolónganse tanto no tempo que ata as empresas que participan creban. Ademais, veremos como o custo da obra, pola inflación, será maior agora do que era nun inicio. Quen vai asumir a responsabilidade neste incremento dos gastos?”, dixo o popular.
En 2021, o Goberno local comprometeuse a dar inicio ás obras: “Non hai obra municipal exenta de atrasos e problemas, pero neste caso, a gravidade do asunto parécenos que excede do tolerable”. Cabe lembrar, que á zona aínda non chega a electricidade, “o que provocará aínda máis atrasos na finalización da obra”.
“É algo habitual o atraso das obras do Concello, pero é completamente ilóxico que tres anos despois de que os terreos sexan municipais non se moveu nin unha pedra”, recalcou o concelleiro. “A incapacidade do Concello para facer obras quedou novamente constatada”, rematou.
