• A cita será ás 12.00 horas no adro da igrexa de San Salvador, onde o concelleiro responsable de Promoción Económica e Urbanismo tamén dará a coñecer detalles e resolverá dúbidas sobre outros proxectos e obras xa en marcha ou en tramitación na parroquia
• O edil socialista lembra que se habilitará un dispositivo especial durante o desenvolvemento dos traballos para garantir o aceso e saída ao CEIP Viñas, ademais de intentar causar “as menos molestias posibles” a residentes
O adro da Igrexa de San Salvador acollerá este domingo, a partir das 12.00 horas, unha reunión informativa, convocada polo concelleiro de Promoción Económica e Urbanismo, o socialista Gregorio Agís, na que se darán a coñecer os pormenores do proxecto de humanización e mellora integral da contorna da Rúa do Adro e Porteliña. Son unhas obras que darán comezo a vindeira semana e que servirán para que este núcleo de relevancia dentro da parroquia experimente unha profunda renovación, pasando a contar con novos servizos básicos e unha mobilidade sostible e universal.
Agís explicará os pormenores da obra e do dispositivo que se habilitará durante o desenvolvemento da mesma. Trátase dunha medida temporal pensada para garantir o aceso e saída ao CEIP Viñas e para tratar de minimizar molestias ás persoas residentes.
O concelleiro do PSdeG-PSOE recorda que se permitirá a entrada ao centro educativo desde o cruce onde está situado o semáforo da avenida da Porteliña. Por aí tamén poderán saír á estrada autonómica os autobuses. O resto dos vehículos para abandonar a zona deberán circular polo Camiño Poio de Arriba. A maiores, habilitarase un aparcadoiro disuasorio nunha parcela próxima á PO-308, para garantir prazas de estacionamento durante a realización dos traballos
O concelleiro de Promoción Económica e Urbanismo tamén se compromete a achegar información e resolver dúbidas sobre outros proxectos de calado impulsados por este departamento municipal en San Salvador, como as obras no núcleo da Seara, Portosanto e Saíñas ou o proxecto contemplado para mellorar a contorna de Anafáns.
