• O alcalde confirma que o Goberno local volverá implicarse neste 2025 nunha nova edición da campaña ‘Eu merco en Caldas’, logo do éxito acadado por esta iniciativa durante o ano pasado
• Pérez Gulín tamén aposta por ir da man con man entre a institución pública e o ámbito privado para avanzar cara a desestacionalización, axudando, deste xeito, a que Caldas de Reis “sexa un concello atractivo durante os doce meses do ano”
O alcalde de Caldas de Reis, Jacobo Pérez, continúa coa rolda de encontros e reunións de traballo que está a manter nas últimas semanas con entidades, agrupacións e axentes dinamizadores da actividade do municipio en diferentes eidos. Dúas destas últimas citas tiveron lugar nos últimos días, con profesionais do pequeno comercio e da hostalería local, para analizar e estudar propostas a continuar desenvolvendo neste 2025, e que xa se levaron a cabo con éxito no que vai de mandato, como foi o caso da campaña ‘Eu Merco en Caldas’. A iniciativa, que se estrou a mediados de 2024, “naceu co obxectivo de favorecer as compras de proximidade e impulsar a actividade hostaleira, de xeito que os negocios da vila pasen a ser un referente non só para a nosa veciñanza, senón tamén para persoas doutros municipios da bisbarra”, indicou Pérez Gulín. Ao abeiro desta campaña impulsáronse actividades como ludotecas infantís e descontos de todo tipo, así como programas de difusión. Ante a boa acollida acadada, o Concello continuará implicándose nunha
edición de ‘Eu Merco en Caldas’ neste 2025. “Non renunciamos a continuar mellorando e promovendo propostas que axuden a consolidar dous dos principais dinamizadores económicos e sociais do noso concello, como son o comerio e a hostalería”, resaltou o alcalde caldense.
O líder do Goberno local salienta a “boa sintonía e a comunicación fluída” que se está a manter nestes encontros, que continuarán convocándose de xeito periódico. “A intención é reunirnos cada mes ou mes e medio para seguir traballando en propostas interesantes para estes sectores. O máis importante é buscar unha coordinación que redunde en beneficio destas actividades, que son un dos motores principais de Caldas de Reis”, conclúe Pérez.
Hostalería No caso en concreto da hostalería, os obxectivos que se marca o Concello e o propio sector pasan por continuar ‘estirando’ a actividade durante todo o ano, na busca dunha desestacionalización que axude a confirmar a Caldas de Reis como un destino atractivo durante os doce meses do ano.
