• O alcalde de Caldas de Reis valora positivamente o encontro, no que se acordou elaborar un borrador inicial para a cesión demanial
• Pérez Gulín lembra que o Goberno local asume estas xestións como consecuencia do cambio de criterio por parte da Deputación de Pontevedra, titular da estrada
O alcalde de Caldas de Reis, Jacobo Pérez, desprazouse ata Madrid o pasado luns para manter unha reunión con responsables da Garda Civil no Ministerio de Interior, para avanzar na tramitación necesaria para poder impulsar a ansiada recuperación de espazos e mellora da seguridade viaria e peonil na Travesía de Doña Urraca, situada na estrada EP-8005. O rexedor caldense citouse co General de Brigada, Fernando José Sánchez Gómez; o coronel José Luis Muñoz, o tentente coronel Julián Martínez, e a xefa de Área de Gestión Patrimonial do organismo estatal, María del Carmen Pérez. Pérez Gulín calificou como “moi positivo e produtivo” este encontro ao tempo que agradeceu as xestións de María del Carmen Pérez para promover a reunión e o interese amosado porlos dirixentes do Instituto Armado “á hora de propoñer solucións para desbloquear un proxecto que é chave para o crecemento de Caldas de Reis”. Unha das cuestións acordadas foi a elaboración dun borrador de convenio para facer efectiva a cesión demanial dos terreos necesarios para a reforma da travesía, uns espazos que a día de hoxe son de titularidade da propia Garda Civil e que se atopan nas inmediacións do cuartel dad Benemérita na vila termal. Tal e como recordou o propio Jacobo Pérez, no ano 2023 a Deputación de Pontevedra anunciou o proxecto de mellora de seguridade peonil e viaria neste enclave. Nese primeiro proxecto, a propia Administración provincial asumía tamén as xestións para a obtención dos terreos necesarios, un punto que foi modificado pola institución pontevedresa hai uns meses. “Unha vez que a Deputación nos trasladou este cambio de criterio, desde o Goberno local aceleramos as xestións para tratar de conseguir a concesión demanial o antes posible”, explicou o Jacobo Pérez, que confía en que o borrador do documento sexa unha realidade no menor tempo posible. “Pola nosa parte imos traballar sen descanso para facilitar que a Deputación acometa o proxecto”, garantiu.
Hai que lembrar que a principios deste ano, o alcalde de Caldas de Reis mantivo unha reunión co presidente provincial, Luís López, no que se abordou este tema. O investimento total para a realización da obra achegarase aos 500.000 euros, dos cales o Concello asumirá o 30%. Unha vez que a cesión de terreos por parte do Ministerio de Interior sexa unha realidade, a Administración local dará traslado da documentación á Deputación de Pontevedra. Ademais, existe tamén o compromiso de que a travesía pase a ser de titularidade municipal unha vez a reforma estea concluída.
A reunión no Ministerio de Interior con responsables da Garda Civil en Madrid é un encontro máis dentro dos que ten levados a cabo xa Jacobo Pérez desde que chegou á Alcaldía a finais de decembro, e que lle levaron tamén a traballar no desenvolvemento de proxectos e obras futuras, ademais de coa propia Deputación de Pontevedra, con Augas de Galicia, a Consellería de Sanidade, Zona Franca ou a Subdelegación do Goberno en Pontevedra. No caso da Travesía de Doña Urraca, Pérez Gulín lembra que “esa parte da estrada provincial forma parte do Camiño Portugués e ten un tránsito moi elevado de peóns, polo que para nós é unha das actuacións máis urxentes a desenvolver. Por iso, desde o Goberno local non imos escatimar esforzos para facilitar todas as xestións e tramitacións que poidamos, tal e como xa fixemos tamén no seu momento coa Xunta de Galicia para impulsar o convenio do futuro Centro de Saúde”, concluíu.
