O goberno de AV retoma un proxecto paralizado desde 2017 e consegue o visto bo da Xunta para avanzar cara á súa legalización e urbanización definitiva
O goberno municipal de AV, liderado polo alcalde Luciano Otero, vén de dar un paso decisivo para desbloquear a situación de alegalidade na que se atopaba o polígono industrial de Pazos de Borbén desde hai máis de sete anos.
O proxecto fora aprobado inicialmente en Pleno no ano 2017, pero nese mesmo ano a Xunta emitiu un requirimento técnico que nunca foi contestado polo goberno anterior do PP. Desde entón, o polígono quedou nunha situación de bloqueo absoluto, impedindo o seu crecemento e xerando inseguridade xurídica ás empresas xa instaladas nel.
O novo executivo municipal de AV decidiu retomar este asunto prioritario e, tras un intenso traballo técnico e político en coordinación con Urbanismo da Xunta, vén de remitir a documentación corrixida atendendo ás indicacións do informe oficial e á reunión mantida coa directora xeral de Urbanismo. Segundo o falado con ela, esta nova documentación subsanaría todas as deficiencias sinaladas, polo que a Xunta estaría en disposición de emitir o seu visto bo definitivo.
Con esta validación, só restaría a aprobación final en Pleno para que o polígono industrial quede plenamente desbloqueado. Isto permitirá iniciar as obras de urbanización, dotar os terreos dos servizos básicos e comezar a conceder licenzas ás empresas interesadas.
Desde o Concello, o alcalde Luciano Otero manifesta a súa satisfacción por este importante avance:
“Estamos a corrixir anos de abandono e parálise. O noso compromiso é claro: poñer a funcionar o polígono para xerar actividade económica, emprego e futuro para Pazos.”
