Á espera da resolución definitiva serán un total de 17 entidades xuvenís as que gozarán destas axudas que ascenden a preto de 80.000 euros e repartirán entre 1.700 e 5.000 euros por entidade
O presidente da Deputación de Pontevedra, Luis López, acaba de anunciar a aprobación provisional das axudas de +Xuventude, “a primeira liña de subvencións da historia da Deputación dirixida á mocidade da provincia”. López, que se amosou “moi orgulloso da acollida” desta iniciativa, subliñou que á espera da resolución definitiva serán un total de 17 entidades xuvenís as que gozarán destas axudas que repartirán en total preto de 80.000 euros.
As primeiras axudas provinciais á xuventude da Deputación de Pontevedra destinarán entre 1.700 e 5.000 euros aos 17 colectivos beneficiados. Con estes recursos, as entidades xuvenís poderán poñer en marcha proxectos relacionados coa música, co deporte, coa ciencia, cos hábitos saudables, coa natureza e o medio ambiente, co ocio saudable ou coa integración social.
Para o presidente provincial, os proxectos presentados ás axudas de +Xuventude “demostran que a mocidade da nosa provincia ten moitas iniciativas, moito talento e está moi comprometida; o que deixa patente que, sen dúbida algunha, Pontevedra ten moito futuro con eles e que a Deputación debe estar ao seu carón”.
