Son 17.000 euros para dous clubs de piragüismo, 52.000 euros para catro clubs de remo e 9.000 euros para dous clubs de vela, que recibirán achegas de ata 21.000 euros
O presidente da Deputación de Pontevedra, Luis López, anunciou o reparto de 80.000 euros entre oito clubs náuticos da comarca do Morrazo, que recibirán ata un máximo de 21.000 euros para sufragar gastos federativos, de competición e adestramento, de persoal, de material deportivo ou gastos sanitarios. “O noso compromiso co deporte tradúcese en recursos concretos para promover a práctica deportiva e para impulsar todas as modalidades, apoiando aos clubs e federacións de todas as disciplinas deportivas”, asegurou o presidente provincial.
Dos 80.000 euros aprobados, dun total de 500.000 € en toda a provincia, 17.000 euros serán para dous clubs de Cangas da categoría de piragüismo, 52.000 euros para catro clubs de remo dos tres concellos e os outros 9.000 € repartiranse entre dous clubs de Cangas na categoría de vela.
En concreto, en piragüismo o Club de Mar Ría de Aldán recibe 15.340 € e o Club Piragüismo Aldán 2.153 €, ambos de Cangas. No caso do remo, en Bueu o Club do Mar Bueu contará con 18.684 €, o Club de Remo Vila de Cangas con 4.012 €, a Sociedade Deportiva Tirán de Moaña con 21.415 € e a Sociedad Deportiva Samertolameu tamén de Moaña con 8.414 €. Por último, na modalidade de vela o Club Deportivo Wind&Sup recibirá 780 € e o Club Náutico 9.014 €, ambos de Cangas.
