O presidente provincial salienta o compromiso da Deputación para cooperar cos concellos na execución dos proxectos estratéxicos que modernizan o espazo urbano
A colaboración prevista para este ano do organismo provincial co Concello de Vila de Cruces a través dos plans de Cooperación é de preto de 1,6 millóns de euros
O presidente da Deputación de Pontevedra, Luis López, acaba de asinar o convenio de colaboración co alcalde de Vila de Cruces, Luis Taboada, para o financiamento do proxecto de humanización do núcleo urbano de Vila de Cruces, concretamente das rúas Neira Vilas, Sergio Iglesias Pazos e Travesía Vázquez 5. Un acordo asinado no marco do Plan Extra, o plan de investimentos do goberno provincial que mobiliza ata 38 millóns de euros entre os concellos de menos de 50.000 habitantes da provincia para executar proxectos estratéxicos. No Pazo provincial, López e Taboada selaron un acordo para impulsar a actuación, que ascende a preto de 913.000 euros que serán financiados integramente p ola Deputación de Pontevedra, con 700.000 euros do Plan Extra e outros preto de 213.000 euros do +Provincia.
O proxecto abrangue a transformación urbana de Vila de Cruces, cunha actuación nas rúas Neira Vilas, Sergio Iglesias Pazos e na Travesía Vázquez 5, que vai mellorar a funcionalidade e accesibilidade e a crear un espazo accesible, sostible e máis atractivo para dotar á localidade dun modelo urbano máis moderno e centrado nas persoas. Deste xeito, crearase unha plataforma única para eliminar os desniveis e permitir a convivencia entre peóns e vehículos cunha calzada en sentido único; dotarase á contorna de aparcamento en liña; e ampliaranse as beirarrúas, con zonas axardinadas, árbores, bancos e papeleiras. A actuación complétase coa renovación das infraestruturas urbanas e a instalación dun novo alumeado público con tecnoloxía LED máis eficiente. Ademais, reforzarase a seguridade viaria con pasos de peóns elevados e zonas específicas para o tránsito de bicicletas.
A colaboración da Deputación co Concello de Vila de Cruces non se limita unicamente ao Plan Extra. O Concello ten previsto recibir este ano de mans do organismo provincial preto de 1,6 millóns de euros a través de programas do servizo de Cooperación como o Plan +Provincia e o Plan Extraordinario de Infraestruturas Deportivas.
