O presidente provincial salienta o compromiso da Deputación para cooperar cos concellos na execución de proxectos estratéxicos que modernizan o espazo urbano
A colaboración prevista para este ano do organismo provincial co Concello de Catoira a través dos plans de Cooperación é de preto de 1,1 millóns de euros
O presidente da Deputación de Pontevedra, Luis López, acaba de asinar o convenio de colaboración co alcalde de Catoira, Xan Castaño, para o financiamento do proxecto de conexión peonil entre o centro urbano da vila e os enclaves turísticos de Pedras Miúdas. Un acordo asinado no marco do Plan Extra, o plan de investimentos do goberno provincial que mobiliza ata 38 millóns de euros entre os concellos de menos de 50.000 habitantes da provincia para executar proxectos estratéxicos. No Pazo provincial, López e Castaño selaron un acordo para impulsar a actuación, que ascende a 711.417,49 euros que serán financiados pola Deputación de Pontevedra, con 540.000 euros (500.000 do Plan Extra e outros 40.000 do +Provincia), e polo Concello de Catoira, con máis de 171.417,49 euros.
O proxecto busca establecer unha conexión peonil entre o centro urbano de Catoira e os enclaves turísticos de Pedras Miúdas, abordando a mellora da accesibilidade e a recuperación do espazo público para as persoas. Para executala, proponse a creación dunha plataforma única que prioriza o tránsito peonil e mellora o sistema de drenaxe para canalizar as augas pluviais. Ademais, renovarase a iluminación, con luces LED eficientes, e instalarase mobiliario urbano como bancos e papeleiras. A actuación tamén contempla a recuperación do trazado histórico do Camiño Real e a mellora de sendas naturais que conducen á lagoa e aos muíños do vento, con sendas restauradas que respectan o entorno e facilitan o tránsito seguro.
A colaboración da Deputación co Concello de Catoira non se limita unicamente ao Plan Extra. O Concello ten previsto recibir este ano de mans do organismo provincial preto de 1,1 millóns de euros a través de programas do servizo de Cooperación como o Plan +Provincia e o Plan Extraordinario de Infraestruturas Deportivas.
