O presidente provincial remarcou que “seguimos avanzando, unha semana máis, con recursos e actuacións concretas, para que a rede de estradas provinciais que vertebra o conxunto do noso territorio estea nas mellores condicións posibles de seguridade”
A Xunta de Goberno da Deputación aprobou o expediente para contratar as obras de mellora da seguridade viaria en catro estradas provinciais de Campo Lameiro, cun investimento de preto de 605.000 €
Tamén se deu luz verde ao proxecto de execución da obra de mellora da seguridade viaria na estrada provincial EP-0004 Marcón-Pintos-A Reigosa, cun investimento de preto de 275.000 €
Luis López acaba de confirmar investimentos por valor de preto de 900.000 € para mellorar a seguridade viaria en cinco estradas provinciais que atravesan Campo Lameiro, Ponte Caldelas e Pontevedra. “Seguimos avanzando, unha semana máis, con recursos e actuacións concretas, para que a rede de estradas provinciais que vertebra o conxunto do noso territorio estea nas mellores condicións posibles de seguridade”, subliñou o presidente.
A Xunta de Goberno da Deputación aprobou o expediente para contratar as obras de mellora da seguridade viaria en catro estradas provinciais que atravesan Campo Lameiro, cun investimento de preto de 605.000 €. Trátanse, tal e como explicou o presidente, da EP-8301 O Couso-Armonda, da EP-8302 O Couso-Agueiros, da EP-8303 Igrexa de Fragas e da EP-8304 Moimente-Armonda, onde se van adecuar marxes, reabrir cunetas e perfilar noiros; mellorar a drenaxe e instalar colectores soterrados para conducións das augas; instalar redutores físicos de velocidade e novas barreiras de seguridade e repoñer firme e sinalización horizontal e vertical.
Tamén se deu luz verde ao proxecto de execución da obra de mellora da seguridade viaria na estrada provincial EP-0004 Marcón-Pintos-A Reigosa, cun investimento de preto de 275.000 €. Esta mesma semana, tal e como recordou Luis López, a deputada de Infraestruturas Belén Cachafeiro visitou esta estrada provincial que une Ponte Caldelas e Pontevedra e que vai ser mellorada nun tramo de preto dun quilómetro que discorre polo primeiro concello, onde se van desenvolver traballos de saneo, de mellora do firme e de reposición da sinalización horizontal e vertical.
