O presidente provincial, acompañado polos deputados Isabel Couselo e Javier Tourís, comprobou o remate das obras, que se estenderon ao longo de oito quilómetros
O presidente da Deputación de Pontevedra, Luis López, resalta o “compromiso” do organismo provincial coa mellora da seguridade viaria da rede de estradas provinciais nunha visita a Portas, para comprobar o remate das obras realizadas na EP-8004. Os traballos, que se estenderon ao longo dun treito de oito quilómetros, supuxeron a achega de preto dun millón de euros por parte da Deputación. “Poñemos a disposición dos veciños e veciñas dos catro concellos polos que transcorre esta estrada e de todas as persoas que a usan unha vía que vertebra o territorio”, sinalou o dirixente despois percorrer un treito da estrada para comprobar o remate das obras acompañado polo alcalde de Portas, Ricardo Martínez; os deputados provinciais Isabel Couselo e Javier Tourís; e membros das corporacións municipais de Portas, Caldas, Meis e Vilanova, concellos que atravesa esta EP-8004.
A intervención, xa rematada, centrouse nun ámbito de oito quilómetros, maioritariamente no termo municipal de Portas, onde se mellorou tanto o firme e a sinalización horizontal, como a seguridade viaria a través da implantación de pasos de peóns sobreelevados. Unha obra que complementa outra realizada con anterioridade en Meis para a construción dunha senda peonil e que terá continuidade nos vindeiros meses con actuacións enmarcadas nos plans provinciais de mellora de firmes ou de cunetas. “Todo esforzo dá os seus froitos e aquí podemos ver a mellora dunha infraestrutura vital para a veciñanza así como a colaboración cos concellos para articular solucións a grandes problemas”, puntualizou López.
Neste sentido, o presidente da Deputación fixo fincapé no “compromiso” da Deputación coas estradas provinciais, que se traduce en accións concretas como a recente adxudicación do contrato de mantemento da rede viaria por 39 millóns de euros para os vindeiros cinco anos, os convenios asinados cos concellos para a mellora das estradas ou o fortalecemento das colaboracións entre as administracións provincial e municipais para ofrecer mellores servizos. “Avanzamos cara obxectivos que perseguimos desde a Deputación, como son mellorar a seguridade viaria e peonil”, puntualizou López.
Despois de dar as grazas aos representantes da empresa adxudicataria e dos representantes dos catro concellos polo traballo realizado, o presidente da Deputación concluíu que “seguimos tendendo pontes para proporcionar mellores servizos á veciñanza, cumprindo a nosa obriga de mellora da rede viaria e traballando en todos os eidos para que a provincia vaia a máis”.
