O candidato á alcaldía de Caldas de Reis, Manuel Fariña, afirmou hoxe que os 15 puntos do
programa de goberno do BNG é un compromiso de acción, un contrato coa cidadanía para
transformar Caldas nun “concello onde se poida traballar e dea gusto vivir”.
Entre os puntos que salientou o candidato nacionalista están abrir as pozas da Tafona nos 100 primeiros días de goberno, e recuperar e poñer en valor a fábrica da luz e o seu entorno para que sexa un “referente turístico de primeira para Caldas”.
Ademais, o BNG aposta por poñer en valor o Campo da Torre e a Prazuela, “devolvéndolle o espazo público ás persoas”, mellorar o entorno do Umia e o Bermaña, ampliar e mellorar a rede de saneamento no rural, conservar e mellorar a seguridade viaria en todas as rúas de Caldas, ampliando as beirarrúas, reducindo o tráfico de paso e calmando a velocidade.
Para Manuel Fariña, o contrato que o BNG asina coa cidadanía incide tamén na mellora das instalacións deportivas, nunha programación cultural e deportiva estable ao longo do ano, que inclúa ás parroquias, a mellora da limpeza e mantemento de rúas, parques e xardíns. “Unha vila coidada e pensada para as persoas fai máis fácil a vida e axuda á dinamización social e económica”, afirmou Fariña.
O candidato nacionalista fixo fincapé na necesidade de “fomentar o desenvolvemento económico e o emprego, apostando polo comercio local e a industria”.
“O meu compromiso e o compromiso do BNG é un compromiso firme cos veciños e veciñas de Caldas, un compromiso feito desde o diálogo, a honestidade e a transparencia, un compromiso para solucionar os graves problemas que temos e facer de Caldas un concello onde a xente poda vivir cómoda, segura e feliz”.