• Luis López sinala que “é momento de que o concello recupere un alcalde da Cañiza para a xente da Cañiza, un alcalde que viva, sinta e se desviva por este concello”.
Miguel Domínguez Alfonso será o candidato do Partido Popular á alcaldía da Cañiza nas eleccións municipais de maio. O voceiro popular, arroupado polo presidente provincial, Luis López, e a secretaria xeral do partido, Luisa Piñeiro, anunciou esta tarde a súa candidatura ante a xunta local do PP, afiliados e simpatizantes.
“Hoxe comeza o cambio que tanto necesita A Cañiza”, sinalou o candidato, quen di que se presenta por tres motivos: “en 2019 gañamos as eleccións, e síntome con forza e lexitimado para intentar recuperar a alcaldía. Teño a experiencia de oito anos de Goberno, pero tamén estes catro anos na oposición, que me permitiron ter unha visión global, recoñecendo os acertos pero sobre todo os erros. E quero ao meu concello, e por iso dóeme ver a parálise destes anos, e os investimentos e as oportunidades que se perderon pola incompetencia do alcalde”.
Para conseguir a confianza maioritaria dos veciños, Domínguez dixo que seguirá traballando co mesmo compromiso e dedicación que estes meses e contará cunha candidatura renovada, con representación de todas as parroquias e sectores. “O mellor equipo para gobernar A Cañiza desde o minuto un”. Ademais, sinalou que están renovando a xunta local, con novos coordinadores, responsables por parroquias e outros cargos do partido, que se irán coñecendo nos próximos días.
Pola súa parte, Luis López recordou que A Cañiza é un dos doce concellos da provincia nos que o PP gañou as eleccións en 2019 pero que os seus gobernos locais “levan máis de tres anos repartidos, e moi mal xestionados, entre os perdedores das municipais”. Por iso, engadiu, “é momento de que o concello recupere un alcalde da Cañiza para a xente da Cañiza, un alcalde que viva, sinta e se desviva por este concello”.
Nesta liña, puxo en valor todo o traballo feito por Miguel nestes anos na oposición. “Non é sinxelo estar na oposición e manter este nivel de compromiso e de constancia, e por iso é de agradecer o traballo constante, intenso e con centos de horas de dedicación do candidato e do grupo municipal”.
A diferencia de hoxe con 2019, engadiu, é que os veciños xa teñen experiencia e poden comparar entre dous modelos de Goberno e de compromiso, “e as dificultades que estamos atravesando poñen de relieve que é importante contar con Gobernos sólidos, estables e comprometidos, e o Partido Popular sempre é unha garantía de crecemento e de estabilidade”.
