Un Orzamento adecuado á realidade de Moraña e que reflicta unha boa xestión municipal.
Así é como o alcalde, José Cela, describiu esta mañá a Memoria xustificativa do gasto que se levará esta noite a Pleno e da que resultará a aprobación do Orzamento anual para o 2023 do Concello de Moraña.
A cifra será un 6,22% maior ca do ano pasado, acadando un total de 2.765.858 euros. Son máis de 162.000 euros a maiores, que cubrirán as necesidades da xestión municipal. “O que procuramos é poder ter un control do gasto público e unha eficiencia total na utilización dos cartos dos que dispoñemos”, explica o rexedor.
O capítulo de gasto de persoal vese incrementado para repercutir o incremento do 2,5% da masa salarial dos funcionarios e do persoal laboral, así como polo persoal eventual que xestiona o Obradoiro de Emprego Ulla-Umia VI e para aplicar a suba do IPC.
Por outra banda, tamén se recolle na memoria xustificativa do gasto aqueles incrementos de custo que todas as administracións, empresas e particulares están asumindo no que respecta ao subministro eléctrico, os carburantes e o alumeado público.
Asemade, o rexedor quixo destacar o carácter de “austeridade” que teñen os Orzamentos.
“Estes orzamentos recollen a realidade do gasto do Concello para prestar os servizos sen endebedarse. Son uns orzamentos continuistas, aínda que aumentemos lixeiramente a partida, porque desde fai anos nos estannos a dar moi bo resultado. Precisamente, a falla de endebedamenro e o remanente de Tesourería permítenos presentar proxectos ás subvencións doutros organismos nos que o Concello ten que aportar unha parte con fondos propios, que oscilan entre o 20 e o 30% da inversión”, explica o alcalde.
Ademais, o rexedor engade que no que respecta a proxectos e obras concretas, “non se recollen como tal porque non coñecemos que subvencións van saír”. “O que conseguimos con estas contas”, resume, “é ter un Concello saneado”.
