O PIA Factoría do Deporte Galego – Galicia Sports 360 continúa avanzando no seu desenvolvemento no municipio de Mos. A Xunta de Goberno Local vén de aprobar as licenzas urbanísticas para a construción de tres edificios previstos na primeira fase do proxecto: o edificio mixto, o pavillón para vestiarios, oficinas e zona de restauración e a clínica.
Estas autorizacións supoñen un paso decisivo para o avance dun proxecto estratéxico impulsado polo Real Club Celta de Vigo, integrado no Proxecto de Interese Autonómico (PIA) GS360, aprobado pola Xunta de Galicia o 14 de abril de 2025.
En conxunto, a autorización destes tres edificios (que suman unha edificabilidade total de 16.044,71 m²) supón activar unha inversión de máis de 15 millóns de euros, que reforza o carácter estratéxico da Factoría do Deporte Galego – GS360 para Mos e para toda a área metropolitana. Trátase dun impulso económico directo que permitirá avanzar na creación dun polo de innovación deportiva único en Galicia, con impacto no emprego, na actividade local e na proxección exterior do municipio.
Edificios autorizados
* Edificio Mixto: contará cunha edificabilidade de 10.389,16 m², destinado a usos educativos e socioculturais, e cun orzamento de máis de 8,5 millóns de euros.
* Pavillón para vestiarios, oficinas e zona de restauración: terá unha edificabilidade de 4.396 m², destinado a uso de clase deportiva, oficinas e restauración, cun orzamento de máis de 5,5 millóns de euros.
* Clínica: infraestrutura sanitaria deportiva de última xeración ao servizo do complexo GS360. Edificarase sobre 1.259,55 m², destinados a uso sanitario-asistencial, e conta cun orzamento de máis de 1 millón de euros.
A aprobación das licenzas acredita que os proxectos cumpren coas condicións urbanísticas, técnicas e normativas recollidas no PIA GS360, así como co resto da normativa aplicable. A documentación define usos, superficies, implantación e sistemas construtivos de cada edificio, permitindo dar continuidade ás obras previstas dentro da Etapa I do proxecto.
A alcaldesa de Mos, Nidia Arévalo, destacou que esta aprobación “representa un novo fito na implantación definitiva da Factoría do Deporte Galego no noso concello, un proxecto tractor que xera actividade económica, emprego e posiciona a Mos como referencia do deporte e da innovación en Galicia”.
Coa concesión destas tres licenzas, o Concello de Mos continúa dando pasos firmes na colaboración institucional e técnica que permite que a Factoría do Deporte Galego avance segundo os prazos previstos.
