A alcaldesa de Mos, Nidia Arévalo, a concelleira de Economía e Facenda, Feli Rodríguez, e a Interventora municipal, atópanse xa inmersas no orzamento municipal para o vindeiro ano 2025.
Trátase dun presuposto de 14 millóns de euros que “se mantén e non aumenta no capítulo de Ingresos, ao continuar conxeladas todas as taxas e impostos municipais, tal e como tiñamos comprometido; e ao non contar aínda con información sobre a suba dos Fondos de Cooperación e os Tributos do Estado”, declararon as representantes municipais, Arévalo e Rodríguez.
Así mesmo rexedora local e edil de Facenda informaron de que “temos previsión de que os ingresos poidan ir aumentando a medida que vaiamos recibindo convenios con outras administracións supramunicipais, así como subvencións, etc.”
“E é que desde o Concello de Mos seguimos a traballar sen descanso con outras administracións para avanzar na nosa folla de ruta, marcada polo cumprimento do programa electoral, e para elo, para poder acometelo na máxima porcentaxe posible, buscamos a colaboración e o apoio supramunicipais presentándonos a todas as convocatorias de liñas de subvencións posibles; dado que temos un ambicioso programa, que doutro xeito o noso axustado orzamento non nos permitiría levar adiante”, explicaba a alcaldesa Nidia Arévalo.
Nidia Arévalo salientou ademáis que “este novo presuposto daralle maior importancia nas negociacións con outras administracións ás obras prioritarias. Así será como marcaremos a folla de ruta, baseándonos no noso programa electoral, aínda que o plan local de inversión sexa moi reducido, lograremos así o apoio económico para o investimento en novas obras, apoiándonos noutras administracións”.
Así mesmo, sobre o capítulo de Gastos, as representantes do Concello de Mos, adiantaron que “destaca a continuidade da baixada do endebedamento, que sigue descendendo e nos atopamos xa nun 20%, moi próximos á débeda cero, e é salientable tamén que para o vindeiro ano 2025 amortizarase un dos préstamos contraídos”. Nidia Arévalo e Feli Rodríguez informaron tamén, dentro do capítulo de Gastos, de que se manterá o gasto en Persoal e Servizos.
Deste xeito, e unha vez máis, Arévalo aprobará o orzamento municipal en tempo en forma, antes do remate do exercizo económico en vigor. Farao por décimo sexta vez consecutiva e tras ser o ano pasado Mos un dos primeiros Concellos galegos en aprobar o orzamento municipal para o presente 2024. Nesa ocasión Mos, falamos do orzamento do 2024, adiantouse máis que outros anos na aprobación do orzamento, rematando o documento en outubro de 2023. A alcaldesa Arévalo e a concelleira Rodríguez esperan dárlle continuidade a estes prazos de pronta aprobación tamén este ano. Polo de pronto, os primeiros pasos cara o documento final atópanse xa iniciados.
