• SERÁ DE NOVO NAS INSTALACIÓNS DO RECINTO FEIRA INTERNACIONAL DE GALICIA ABANCA, EN SILLEDA (PONTEVEDRA)
• O PRIMEIRO DÍA TERÁ LUGAR UN SHOW DE FREESTYLE MOTOCROSS E TANDAS DE DRIFT, CON ENTRADA ÚNICA PARA ESTE EVENTO
• O SEGUNDO E TERCEIRO DÍA CELEBRARASE O EVENTO COMO TAL, ABRINDO NOS PAVILLÓNS A SÚA EXPOSICIÓN DE COCHES DE COMPETICIÓN E CLÁSICOS E A VENTA DE EQUIPAMIENTO E ACCESORIOS, ADEMAIS DE DAR COMEZO AS SÚAS NUMEROSAS ACTIVIDADES
Motor Show Galicia 2024, organizado por Sac Events, volve ao recinto Feira Internacional de Galicia ABANCA os días 6, 7 e 8 de decembro. E faio con dous eventos espectaculares.
O venres 6 de decembro terá lugar un show de Freestyle Motocrós con acrobacias e saltos extremos nos que os mellores pilotos desafiarán á gravidade e o perigo. Ademais, os asistentes poderán ver un adestramento de drift no que se mostrarán derrapaxes con asombrosas habilidades. Este espectáculo, que é unha especie de previa á propia cita de motor, contará con entrada única e independente.
Xa o sábado 7 de decembro poñerase en marcha o Motor Show Galicia como tal, o cal se estenderá ata o domingo día 8. Esta cuarta edición contará de novo cunha exposición de centos de vehículos de competición, de rally e clásicos que os seus propietarios exhiben nos pavillóns do recinto para que o público poida desfrutar deles, destacando gran cantidade de coches exclusivos e vehículos totalmente personalizados. Ademais, tamén haberá á venda equipamento e accesorios.
Desde shows ata simuladores
Á exposición de Motor Show Galicia 2024 engadirase un programa que contará con gran atractivo. Incluirá espectáculos de Paulo Martinho, pioneiro do freestyle en Portugal; exhibicións de drift tanto diúrnas como nocturnas, simuladores ou circuíto de karts, ademais de zona infantil. Así mesmo, o evento realizará numerosos sorteos, que incluirán desde copilotaxes drift ata pases para algunhas das súas actividades e o espectáculo previo de Freestyle Motocrós & Drift.
En canto ás entradas, aínda que son específicas para cada un dos eventos, é dicir, independentes para o Freestyle Motocrós & Drift por unha banda e para o Motor Show por outra, tamén existen entradas VIP que dan acceso aos dous eventos.
Toda a información pode coñecerse con detalle nas contas de Motor Show Galicia nas redes sociais Facebook e Instagram.
