A directora de Turismo felicitou a Antonio Varela e Marisol Peso pola conservación da tradición belenista e pola fidelidade nas pezas realizadas con material reciclado
A director da Axencia de Turismo de Galicia, Nava Castro, visitou esta tarde o Belén Artesanal de estilo hebraico, deseñado por Antonio Varela e Marisol Peso e que está instalado na Casa Rectoral do Sagrado Corazón de Ponte Caldelas.
Durante a visita estivo acomopañada polo cura párroco, Benito Vázquez, o presidente da Asociación Cultural O Torreiro de Forzáns, Antón Xil, entidade promotora desta iniciativa que conta coa colaboración da Unidade Pastoral de Ponte Caldelas, e varios membros da Asociación Santa Baia e de Cáritas de Ponte Caldelas, que dirixe Manolo Lois.
Nava Castro destacou a importancia que están a supoñer este tipo de iniciativas que recuperan a tradición belenistas e que se converten nun motor de dinamización do mundo rural polo Nadal.
Castro, que felicitou a Antonio Varela e Marisol Peso, autores do Belén de estilo hebraico, sinalou o rexurdir da tradición belenista en Galicia que se traduce en que cada vez máis composicións de Nadal se incorporan á guía que realiza a Xunta de Galicia para darlles visibilidade e fomentar a súa visita xerando tamén neste sentido un movemento de persoas que contribúen a dinamizar a economía dos lugares onde se expoñen composicións belenistas.
O Belén artesanal que acolle esta ano a rectoral do Sagrado Corazón de Ponte Caldelas é de estilo hebraico e imita unha aldea xudea con elementos arquitectónicos do momento, resultado dun proceso de documentación previo realizado por Antonio Varela e Marisol Peso e que se ergue sobre un escenario árido de deserto e montañoso que coincide coa fisonomía física de Xudea.
MATERIAIS RECICLADOS QUE TEÑEN UNHA SEGUNDA VIDA NO BELÉN
As edificacións presentes no Belén están feitas a man con total realismo e sobresaen os destalles levados a cabo con sumo coidado e cun nivel de precisión extraordinario. Tamén é de salientar a decoración vexetal, os sendeiros e camiños e toda a composición que acada unha beleza única e sorprendente xa que todo el está feito de materiais reciclados que teñen así, a través da arte belenista, unha segunda vida. Esta característica foi tamén especialmente destacada por Nava Castro que agradeceu as explicacións sobre o proceso de elaboración do Belén.
