Xoán Reices: “creo que xa vai sendo hora de que quen ten competencias en seguranza vial na N-640 tome medidas”
O BNG da Estrada realiza unha recompilación de todos os atropelos que houbo na N-640 ao seu paso pola Estrada desde 2019 e envíalla ao ministro de transportes, Óscar Puente.
Segundo explicou o concelleiro do BNG, Xoán Reices, “creo que xa vai sendo hora de que quen ten competencias en seguranza vial na N-640 tome medidas, xa que non é normal que desde 2019 houbera 9 atropelos nesta vía, 2 deles con resultado de morte”.
“Non é primeira vez que levamos ao Congreso a alta sinistralidade que hai na N-640 ao seu paso pola Estrada, e en concreto ao seu paso pola vila”, explica Reices, “de momento con pouco éxito, temos que dicilo, mais seguiremos insistindo porque esta situación é insostíbel”. “Nove accidentes en seis anos, con dúas persoas mortas”, engade, “é motivo abondo para que o ministerio tomara medidas, que non só pasan pola construción da Variante, que nós cremos clave para desconxestionar o tráfico e reducir así o volume de tráfico que pasa pola vila”.
O concelleiro do BNG explicou que farán chegar a recompilación de accidentes na N-640 no noso concello a través de dúas vías. “Por unha banda, enviarémoslla oficialmente a través dos representantes no Congreso e no Senado, Néstor Rego e Carme da Silva, respectivamente; mais tamén lle faremos chegar a lista de accidentes directamente a Óscar Puente, ministro de transportes, a través de Twitter; xa que é tan activo nesta rede social, entre zasca e zasca ao mellor ten un intre para ocuparse das cousas que importan aos veciños e veciñas da Estrada”.
O concelleiro do BNG, Xoán Reices, tamén destacou que “non é normal o papel morno que está tendo o alcalde ante esta situación; debería ter un papel máis activo, e non só de espectador impasíbel, para reclamar ao ministerio medidas para acabar cos accidentes na N-640 ao seu paso pola Estrada”.