O Concello de Ponteareas informa que a cidadanía xa dispón dun punto limpo de proximidade no centro urbano. O delegado territorial da Xunta en Pontevedra, Agustín Reguera, visitou o Concello de Ponteareas para comprobar a colocación deste novo servizo xunto á alcaldesa Nava Castro e o concelleiro responsable do servizo de recollida do lixo, Jesús Cao. Ponteareas é un dos concellos beneficiados pola liña destinada á instalación de puntos limpos de proximidade das axudas da Xunta para o financiamento de actuacións en materia de residuos de competencia municipal.
Ponteareas recibiu máis de 73.000 euros como parte da liña destinada á adquisición de puntos limpos móbiles e 9.000 euros para adquisición de puntos limpos de proximidade grazas á cal poderá achegar este servizo a boa parte dos seus veciños e veciñas.
Así, o concello de Ponteareas puido instalar na rúa Rogelio Groba un punto limpo accesible á toda a veciñanza, unha rúa especialmente transitada e onde se poden depositar aparatos electrónicos de pequeno tamaño como teléfonos móbiles; pequenas consolas ou calculadoras; mandos de control remoto; Cds e DVDs; bombillas, tubos fluorescentes, aceite de cociña, xoguetes, calzado, cartuchos de toner de impresoras ou pequenas pilas e baterías, entre outros pequenos enseres. O edil Jesús Cao adianta que nas vindeiras semanas comezará a funcionar o punto limpo móbil.
A alcaldesa Nava Castro recordou que “seguimos dando pasos para dar cumprimento a nosa estratexia de crecemento que camiñará da man do respecto do patrimonio medioambiental e a súa posta en valor. Instalar novos elementos que permitan un tratamento selectivo do lixo e facilitar o acceso á cidadanía é apostar por un futuro máis verde e facer partícipes e parte activa desta estratexia a toda a cidadanía”.
O delegado territorial aproveitou a visita para lembrar o compromiso da Xunta cun tratamento responsable dos residuos e asegurou que “a Xunta está moi comprometida co coidado do medio ambiente e está disposta a colaborar cos concellos en todo o posible para manter unha contorna limpa, saudable e agradable para todos os galegos e galegas”.
Neste sentido, o delegado territorial destacou a importancia de “seguir ofrecendo incentivos aos concellos para que melloren o seu sistema de recollida e separación de residuos, de forma cara a conseguir uns espazos máis limpos, máis sostibles e máis saudables para todos os galegos e galegas”.
Estas axudas para o financiamento de actuacións en materia de residuos de competencia municipal están cofinanciadas polo Fondo Europeo relativo ao Mecanismo de recuperación e resiliencia, financiado pola Unión Europea NextGenerationEU e contan con catro liñas de actuación.
