O BNG ve “insólito” que un dos areais con bandeira azul do municipio permaneza pechado durante todo o día en pleno mes de xullo por acoller unhas obras de mellora no acceso
Fran Leiro lembra que estes traballos puideron terse feito con antelación e non nunha das xornadas de máis calor das últimas semanas, o que demostra que “o alcalde e o seu equipo de Goberno xa están totalmente superados cando o verán apenas acaba de comezar”
O grupo municipal do Bloque Nacionalista Galego (BNG) de Sanxenxo faise eco do enorme malestar e do enfado de numerosos bañistas, veciños e veciñas, usuarios e usuarias da praia de Area de Agra, na parroquia de Dorrón, que durante todo este mércores permaneceu pechada pola realización dunhas obras de acondicionamento do seu acceso. Unha forma de actuar que, unha vez máis, demostra o desprezo polo rural e a incapacidade de xestión do alcalde, Telmo Martín, quen “está a protagonizar un inicio de verán esperpéntico e calamitoso en todos os sentidos”.
O voceiro do Bloque, Fran Leiro, resalta o “inaudito e insólito” que resulta que o Concello realice estas obras, avisando en redes sociais “con apenas unhas horas de antelación”, cando xa nos atopamos en pleno mes de xullo e con Sanxenxo ateigado de visitantes. “Este tipo de traballos hai que realizalos cunha planificación previa e antes de que comece a tempada estival, non cando xa nos atopamos en xullo e, por se fose pouco, nun dos días máis calurosos das últimas semanas”,denuncia Leiro. O concelleiro do BNG advirte que este proceder “non deixa de ser un novo reflexo da falta de xestión pola que se caracteriza o Goberno do PP e de Telmo Martín”, ademais de supoñer un novo episodio de desprezo cara o rural. “Non é casualidade que esta situación se produza nunha praia que pertence a Dorrón, unha das parroquias peor tratadas polo señor Martín, a quen unicamente lle interesa botar formigón e promocionar a praia de Silgar e os 500 metros que hai á redonda.
O rural, en cambio, segue carecendo de servizos básicos de calidade, redúcenselle actividades culturais no verán e queda excluída da liña de transporte entre Nantes e o núcleo”, apunta Fran Leiro. “O señor Martín véndese como un xestor de primeira, pero a realidade é que aínda acaba de comezar o verán e xa está totalmente superado, con praias pechadas, a vila colapsada pola falta de apartamento e o rural totalmente abandonado”, finalizou Leiro.
