- O albergue da Guarda pecha o próximo luns para mantemento tras acoller a uns 4.700 peregrinos este ano
Dende hai uns anos escóllense as semanas de Nadal para pechar o Albergue Municipal de Peregrinos ante a redución do número de peregrinos nestas datas.
O Albergue permanecerá pechado do luns 15 de decembro ata o xoves 15 de xaneiro, abrindo novamente a partir do venres 16 de xaneiro. Nestas semanas de peche do albergue aproveitase para realizar tarefas de mantemento das instalacións.
A partir de novembro a peregrinación redúcese en todos os camiños. Os meses de menor afluencia de peregrinos son decembro e xaneiro, debido ao menor número de horas de luz, ás festas do Nadal e ao mal tempo.
O número de peregrinos aumenta ano a ano, sobre todo dende a oficialidade no ano 2016. A evolución está representada na maior ocupación dos aloxamentos turísticos. Por exemplo, no 2016 aloxáronse 894 peregrinos mentres que en 2025 rondan os 4.700, cinco veces máis que no 2016 e uns 400 peregrinos máis con respecto a 2024.
Por último, destacar que o Camiño Portugués da Costa segue a crecer, sendo notable a presenza constantes dos peregrinos que percorren as nosas rúas e tamén como mostran os datos rexistrados na Oficina do Peregrino en Santiago con 89.230 peregrinos a día de hoxe, superando os 74.755 rexistrados en todo o 2024 e os 52.000 do ano 2023.
