Juan González, rexedor de Nigrán e historiador experto na Guerra Civil, ten documentado xunto a Antonio Caeiro e Clara de Saá fusilamentos e centos de mortes por fame, frío e as pésimas condicións dos presos
“Cuestionar a realidade de San Simón é un insulto ás vítimas e as súas familias e un atentado contra a memoria histórica, o presidente da Xunta ten que tomar cartas neste asunto. O propio feito de matar de fame é un crime contra a humanidade”, explica
O alcalde de Nigrán, Juan González, historiador experto na Guerra Civil e coautor do libro e documental ‘Aillados. A memoria dos presos de 1936 na Illa de San Simón’ (1995) xunto a Antonio Caeiro e Clara de Saá, enviará un exemplar ao deputado ourensán do PP José Luis Ferro que ven de negar as mortes neste campo de concentración.
“Cuestionar a realidade de San Simón é un insulto ás vítimas e as súas familias e un atentado contra a memoria histórica, o presidente da Xunta ten que tomar cartas neste asunto. O propio feito de matar de fame é un crime contra a humanidade, así o recoñece a ONU. Como mínimo sabemos de 9 asturiáns fusilados (consérvanse as marcas das balas nas tapias) e foron centos os que morreron de inanición, frío ou por absoluta desatención. Está máis que documentado”, explica González, quen iniciou no 1992 un traballo de investigación que permanece activo, recurrindo inicialmente aos arquivos das prisións de Vigo e Pontevedra e entrevistando aos superviventes e as súas familias, cos que chegou a gravar un documental que incluíu á visita á illa xunto con ducias deles 50 anos despois. “Hai milleiros de papeis oficiais que o proban, ademáis de testemuñas. Non se pode permitir este negacionismo e menos dun deputado. San Simón foi un campo de concentración no que se cometeron crimes de guerra”, finaliza.
