• O rexedor define a data de hoxe como “histórica” e salienta que esta sinatura “supón un paso decisivo na mellora da atención sanitaria, algo que merecen os nosos veciños e veciñas, así como a poboración da comarca”
• Pérez comprométese a “traballar sen descanso” para completar as xestións pertinentes e facilitar, deste xeito, que a Xunta de Galicia axilice e non demore a construción da infraestrutura, unha demanda histórica do pobo caldense
O alcalde de Caldas de Reis, Jacobo Pérez, asinou este martes o convenio coa Consellería de Sanidade, en Santiago de Compostela, para a construción do futuro Centro de Saúde da vila. Pérez Gulín, que estivo acompañado do tenente de alcalde e responsable de Sanidade, Manuel Fariña, falou de “data histórica”, xa que “estamos a dar un paso decisivo para dotar ao noso municipio dunhas instalacións que son imprescindibles para ofrecer o servizo sanitario de calidade que merecen non só os e as caldenses, senón tamén a poboación de toda a comarca”.
O feito de asinar este documento serve para culminar preto de dúas décadas de traballo, tal e como lembrou o alcalde. “Foron 18 anos de incontables xestións, reunións e negociacións. Logo de que se produce algunha que outra espera, conseguimos por fin asinar este convenio, un compromiso que Caldas de Reis precisaba e que hoxe se converte nunha realidade”, engadiu. O líder do Goberno local quixo expresar o
seu agradecemento a todas aquelas persoas que “traballaron e loitaron durante todo este tempo para que o proxecto finalmente saia cara adiante”. En primeiro lugar, puxo en valor o esforzo dos veciños e veciñas, así como o dos e das profesionais sanitarias; asociacións veciñais, os grupos políticos que apoiaron esta histórica reivindicación e, sobre todo, “tamén quero agradecerllo a Juan Manuel Rey, quen nunca deixou de esixir e pedir o que é xusto para Caldas de Reis durante a súa etapa como alcalde”.
Jacobo Pérez comprometeu o esforzo do Concello para “traballar sen descanso” á hora de dar cumprimento coas obrigas que debe acometer a Administración local para conseguir que a actuación sexa unha realidade. A organización da parcela, a aplicación da bonificación do imposto corresponente ou o mantemento dos espazos unha vez rematada a obra son algunha das tarefas que asumirá Caldas de Reis, tal e como reflicte o acordo. “Seremos o máis áxiles posibles para facilitar que a Xunta de Galicia leve a cabo a construción no menor tempo posible e evitando calquera tipo de retraso”, garantiu.
“Hoxe, Caldas reafirma o compromiso coa mellora dos servizos públicos e co benestar da nosa xente e dende xa, seguiremos a traballar para que a construción do centro de saúde se leve a cabo no espazo de tempo máis curto posible e que, canto antes, poidamos inaugurar unhas instalacións que estean á altura do que se merecen os nosos e as nosas veciñas, ao tempo que seguimos a consolidar a nosa vila como a capital e gran referente da contorna do Umia”, finalizou.
