O rexedor púxose en contacto co xerente da Área Sanitaria para trasladarlle “o meu malestar e descontento, así como o de toda a veciñanza”, xa que con frecuencia unicamente hai un médico para atender a toda a poboación de Moraña. Ademais, a praza que quedou baleira tras a xubilación dun dos profesionais segue sen cubrirse.
O alcalde de Moraña, José Cela, contactou esta mañá co xerente da Área Sanitaria de Pontevedra-O Salnés para trasladarlle “o meu descontesto, así como o malestar da veciñanza pola situación que se está a vivir de xeito reiterado no noso Centro de Saúde, no que moitos días só hai un médico traballando”.
Tal e como explica o alcalde, en Moraña debería haber tres médicos en activo, pero xa desde hai tempo “só temos dous, porque está sen cubrir a praza que quedou baleira despois de que un dos facultativos collese a xubilación”. Ao ter só dous médicos, no momento en que un destes colle vacacións ou libra, “o noso Centro de Saúde queda atendido só por un médico, o que supón unha atención deficiente para un municipio como Moraña, con máis de 4.000 habitantes”.
Por iso, José Cela trasladoulle ao novo xerente “que necesitamos que esta situación sexa solucionada canto antes. É o SERGAS e, por tanto, a Xunta de Galicia, a que ten que xestionar os recursos da nosa sanidade, que agora mesmo está sendo desatendida en Moraña e non podemos seguir admitindo que se manteña esta situación”, alegou o alcalde.
Cela asegura “entender perfectamente” o malestar que a veciñanza foi trasladando nestes últimos tempos con respecto á atención que se está a prestar no Centro de Saúde da localidade. “Non é un día nin dous, esta situación estase repetindo de xeito reiterado e repetitivo e por iso esiximos que se nos dea unha solución, porque a veciñanza de Moraña ten dereito a unha sanidade en condicións”, rematou.
Na conversa mantida polo alcalde co xerente, este trasladou que desde a Área Sanitaria tratarán de resolver o problema á maior brevidade posible
