Esta actividade chegou aos escolares lamenses a través da colaboración entre o Concello, a Deputación Provincial, o colexio e a ANPA.
O alumnado do CEIP da Lama disfrutou dunha xornada de teatro musical grazas ao programa +Escénicas da Deputación e o Concello da Lama e que puxo en escena o espectáculo “Máis Saaabor!” de Fran Rei e Félix Rodríguez.
A función comezou ás 11 da mañá e contou coa presenza de todo o alumnado do centro así como o alcalde, David Carrera, os concelleiros de Cultura e Deportes, Plácido Pillado Alfaya e de Asuntos Sociais, Trinidad Fernández Oubiña, e varios pais e nais que acudiron ao centro para ver a representación desta obra que tamén contou coa colaboración da ANPA Cal do Vergazo.
Máis Saaabor! mestura música en directo, maxia, humor, moito ritmo e participación do público. Nesta visita cómica, Rei e Rodríguez achegaron ao público ao mundo dos fogóns, á cociña, á alimentación saudable e ao consumo de produtos de proximidade dun xeito entretido e moi musical.
Os actores Fran Rei e Félix Rodríguez Lamas interactuaron cos nenos e nenas ao ritmo da música dos países de procedencia dos cinco pratos que foron condimentando ao mesmo tempo que ían pedindo a colaboración do público para coñecer os ingredientes e a forma de preparalos. Cada un deses cinco platos representaba a un continente así prepararon burriños mexicanos, cuscús marroquino, pasta á carbonara italiana, sushi xaponés e filloas galegas.
Entre bailes, cancións e aplausos do público os actores foron condimentando os pratos que logo, para rematar, foron dados a probar a tres voluntarios do público: un alumno, un mestre e unha mestra.
Rematou o espectáculo co aplauso unánime do público que disfrutou dun menú moi musical que animou aos nenos e nenas a comer de todo, preferiblemente produtos de proximidade e de calidade.